ALMATY. 16 aqpan. Almatyda alaıaqtardyń áreketinen 700-den astam adam zardap shegip otyr. Bul týraly Almaty qalalyq memlekettik kirister departamentiniń baspasóz qyzmetine silteme jasaǵan egemen.kz tilshisi habarlady.
10 qańtar kúni Almaty qalalyq memlekettik kirister departamenti ekonomıkalyq tergeý qyzmetiniń kóleńkeli ekonomıkaǵa qarsy kúres basqarmasynyń qyzmetkerleri talaı adamdy san soqtyryp, alaıaqtyqpen aınalysqan taǵy bir uıymdasqan qylmysty toptyń jolyn kesti. Olardyń Astana, Almaty jáne basqa da oblys ortalyqtarynda qarjylyq pıramıda uıymdastyrǵany áshkere boldy. Qylmysty toptyń quramynda Reseı azamattary da bar.
Atalǵan qylmysty top 2014-2015 jyldary ekinshi dárejedegi bankten nesıe alǵan tutynýshylardy aldaǵan. Negizgi maqsattary – nesıe alýshylar nesıeniń 30-dan 80 paıyzǵa deıingi mólsherin «Fın Statýs» jaýapkershiligi shekteýli seriktestigine aýdarǵan jaǵdaıda, alǵan nesıesiniń ýaqytynda jabylýyna kepildik bergen. Al nesıeni jabý shemasyn jappaı túsip jatqan aqshamen birte-birte kezekpen jabý arqyly aldaǵan.
Búginde uıymdasqan qylmystyq toptyń aldaýyna urynǵan salymshylar sany 700-den asyp ketip otyr. Al nesıelik salymnyń mólsheri jarty mıllıard teńgege jetken. Bul aqshalar qylmysty toptyń esep shottaryna aýdarylyp, sodan keıin qolma-qol aqshaǵa aınaldyrylyp otyrǵan. Qazirgi ýaqytta qarjylyq pıramıdany qurýshylar Reseı azamattary aǵaıyndy Ildar Albertovıch Zıatdınov pen Robert Albertovıch Zıatdınov sottyń sanksııasymen qamaýǵa alyndy.
Endigi tańda qarjylyq pıramıdaǵa aldanǵan salymshylardyń qarajatyn qaıtarý jáne qylmysty toptyń basqa da múshelerin quryqtaý úshin tergeý jumystary júrgizilýde. Sonymen qatar, «Fın Statýs» jaýapkershiligi shekteýli seriktestigimen sybaılas bolǵan «Fın Statýs Konsalt», «Fın Statýs dızaın», «Fın Statýs Invest», «MFO Fın Statýs zaım», «Profıt grýpp», «Everest fınans» jaýapkershiligi shekteýli seriktestikteriniń qyzmeti de tekserilýde.
Almaty qalalyq memlekettik kirister departamentiniń baspasóz qyzmeti atalǵan seriktestiktermen qosymsha nesıe jabý jóninde kelisim jasap, alaıaqtarǵa aldanǵan basqa da salymshylar bolatyn bolsa, tıisti qujattaryn ákelý arqyly Almaty qalalyq memlekettik kirister departamenti ekonomıkalyq tergeý qyzmetine habarlasýlaryna bolady.
Aınash Esalı.
Derek, sýret: Almaty qalalyq memlekettik kirister departamentiniń baspasóz qyzmeti.