Arqa tósiniń on saýsaǵynan óner tamǵan has sheberlerge kende bolǵan kezi joq. Burynǵy ótken ónerlilerdiń búgingi jalǵasy jas kásipker Arman Tosqanbaevty aıtýǵa bolady.
Búgingi kúnde talapty jas óziniń baǵyn saǵat jasaý syndy sırek talant pen ǵalamat yjdaǵattylyqty talap etetin mehnatty iste synap júr. Alǵashqy qadamy jaman emes. Sheberdiń qolynan shyqqan «Otan Patrıoty» dep atalatyn erlerdiń 25 qolsaǵaty kózdi ashyp-jumǵansha ótip ketken. Sıferblatynda Qazaqstannyń Eltańbasy bederlengen saǵattardy depýtattar men memlekettik qyzmetkerler pyshaq ústinde talap áketipti. Naýryz aıynda Arman «Prezıdent» dep atalatyn saǵattyń qymbat jıyntyǵyn qurastyryp shyǵarmaq. Odan keıingi kezekte áıelderge arnalǵan saǵattar tur.
Jaqsynyń isi jerde jatqan ba? Qazirgi tańda Arman tapsyrystyń astynda qalǵan. Elimizdiń túpkir-túpkirinen altyn jáne kúmis saǵattarǵa degen tapsyrystar kún saıyn túsip jatqan kórinedi. Ásirese, Astana men Almatynyń saǵatqumarlary bul sharýada at ozdyryp tur.
Qazirgi tańda Armannyń shaǵyn ǵana sheberhanasynda bes adam eńbek etedi. Kim biledi, múmkin bul Qazaqstan tarıhyndaǵy saǵat shyǵaratyn tuńǵysh manýfaktýranyń basy shyǵar?! «Maǵan bul iste Otanǵa degen súıispenshilik rýhanı kúsh beredi. Elbasymyz otandyq óndiristi damytý kerek degende buǵan men ózimniń úlesimdi osylaısha qosqym keldi», – dep syr aqtarady Armannyń ózi.
Qazir Armandar saǵattyń daıyn bólshekterin qurastyrýmen ǵana aınalysady. Bara-bara bul isti jetildirip, qurastyrýdy tereńdete túsý – kózdegen maqsattyń biri. Mysaly, saǵattyń baýy men korpýsyn jáne bederórnegin salýdy óz betterimen jasaı bastamaq.
Negizinen, qol saǵatyna qajetti bólshekter Shveısarııa, Japonııa jáne Qytaı memleketterinde shyǵarylady. Buryn bul ispen reseılikter de aınalysqan eken, alaıda, olar belgili sebeptermen mundaı sharýadan bas tartypty. Álbette, saǵat jasaý naryǵynda bos oryn joq dese de bolady. Básekelestik degenińiz jalyna qol tıgizbeıdi. Degenmen, solaı eken dep tartynyp otyrǵan Arman joq. Onyń oıynsha, ózindik óndiristi damytyp, ony jergilikti mazmunmen baıytyp, daıyn ónimge patrıottyq tereń mán berý – ıgilikti is, basty mindet.
Arman alǵashqy saǵattardyń dızaınyn óz qolymen syzǵan. Sońynan mamandardyń kómegine súıene otyryp, elimizdegi ataýly datalar men bas qalamyzdaǵy tanymal ǵımarattardy beınelegen nusqalar paıda bola bastady. Armanǵa bul iste ónimi Amerıka men Eýropa naryǵyna taraıtyn «Miami watch» kompanııasynda jumys isteıtin qazaq jigitteri kóp qolǵabysyn tıgizgen eken. Solardyń kómeginiń arqasynda birlesken óndiris qurýdyń múmkindigi týdy.
Armannyń shaǵyn ǵana saǵat jasaý manýfaktýrasynyń jobasy jyl saıynǵy «О́z bıznesińdi jasa!» atty respýblıkalyq konkýrsqa qatysýda. Bul baıqaýdy Keńes Raqyshev (Singulariteam qorynyń áriptes basqarýshysy) pen Vıacheslav Kım («Kaspi Bank» AQ dırektorlar keńesiniń tóraǵasy) qoldaý kórsetetin «Sábı» qaıyrymdylyq qory uıymdastyrǵan. Eger de Arman usynǵan jobanyń juldyzy janyp, báıgege dep tigilgen 100 myń AQSh dollary kólemindegi syıaqyny utyp alar bolsa, qazaqstandyq saǵat jasaýshy sheberlerdiń tasy órge domalaýshy edi. Qomaqty qarjyǵa óndiriske qajetti qural-jabdyq alynsa – joqtan bar jasap jatqan talapty órenderdiń tasy órge domalar edi ǵoı. «Sonda, – deıdi armanshyl jas Arman, – qolyna qazaqstandyq sapaly ári sándi saǵat taqqan otandastaryma ózge jurttyń ókilderi qyzyǵa qaraıtyn bolady».
Qaırat ÁBILDINOV,
«Egemen Qazaqstan».
QARAǴANDY.