ALMATY. 23 aqpan. Almaty qalasynda Qazaq memlekettik qyzdar pedagogıkalyq ýnıversıtetiniń uıymdastyrýymen 26 aqpan kúni elimizdiń 7 oblysynda mektep bitirýshi túlekter arasynda respýblıkalyq «Y.Altynsarın-2016» pándik olımpıadasy ótedi. Bul týraly «Qyzdar ýnıversıteti» medıa ortalyǵyna silteme jasaǵan egemen.kz tilshisi habarlady.
Baǵyn synap kóremin deıtin 11 synyp oqýshylaryna jaqsy múmkindik beretin bilim saıysynyń basty maqsaty – mektep bitirýshilerge mamandyq tańdaýǵa kómektesý, daryndy oqýshylardy aıqyndaý, jastar arasynda irgeli ǵylymı bilimdi damytý, bilimdi jastardyń óz qabiletterin júzege asyrýyna kómektesý, daryndy talapker qyzdardy Qazaq memlekettik qyzdar pedagogıkalyq ýnıversıtetine shaqyrý. Bıyl da olımpıada segiz pán boıynsha: qazaq tili men ádebıeti, orys tili men ádebıeti, aǵylshyn tili, fızıka, bıologııa, geografııa, dúnıejúzi tarıhy, hımııa pánderi boıynsha ótkiziledi. Olımpıadanyń ereksheligi – oǵan tek qana qyz balalar qatysady.
Olımpıada oblystyq bilim basqarmalarymen, aýdandyq bilim bólimderimen belgilengen aımaqtarda birlese otyryp ótkizilmek. Olımpıada atap aıtqanda, Almaty oblysy boıynsha Almatyda, Taldyqorǵanda, Jarkent qalasy men Raıymbek aýdanynyń Kegen aýylynda; Jambyl oblysy boıynsha Taraz qalasy men Qordaı aýdanynda; Ońtústik Qazaqstan oblysynyń Shymkent jáne Túrkistan qalalarynda; Qyzylorda oblysy boıynsha Qazaly, Jańaqorǵan, Qarmaqshy aýdandarynda, Qyzylorda qalasynda; Shyǵys Qazaqstan oblysy boıynsha Semeı jáne О́skemen qalalarynda; Qaraǵandy oblysy boıynsha Qaraǵandy qalasynda; Batys Qazaqstan oblysy boıynsha Oral men Atyraý qalalarynda ótedi.
Qazirgi ýaqytta olımpıadaǵa qatysýǵa tilik bildirýshi oqýshylardy tirkeý jalǵasýda. Aıta keteıik, nıet bildirýshiler Qazaq memlekettik qyzdar pedagogıkalyq ýnıversıtetiniń saıtynda tirkele alady.
Esterińizge sala keteıik, byltyrǵy ótken «Y.Altynsarın-2015» olımpıadasyna 3956 mektep bitirýshi qatyssa, onyń 24-i rektor grantyna ıe bolyp, 10 paıyzdyq jeńildikke 700-ge jýyq oqýshy ilikken.
Aınash Esalı.
Derek, sýret: «Qyzdar ýnıversıteti» medıa ortalyǵy.