Áskerı tehnıkany jóndeý

boıynsha qazaqstandyq zaýyt halyqaralyq naryqqa shyǵýda Ústimizdegi jyly qazaq­standyq «Semeı ınjınırıng» AQ zaýyty halyqaralyq naryqqa shyǵýdy josparlaýda. Otandyq kásiporynnyń bul baǵyttaǵy josparyna T-72 tankterin, jaıaý áskerdiń jaýyngerlik mashınasy (BMP-1) men standartty jáne jańǵyrtylǵan BTR-70 brondy transporterlerin iske asyrý kiredi. Zaýyttyń halyqaralyq na­ryq­qa shyǵýy damýdyń jańa múmkindikterin ashady. Sonymen birge, kásiporyn Qazaqstan Qarýly Kúshteri úshin jańa tapsyrysty iske asyrýǵa ázir. Búgingi kúni múlik jetkizýshilermen kelissózder ótkizildi jáne reseılik «Ýralvagonzavod» UО́K-pen, ýkraınalyq «Ýkrspeseksport» AAQ-pen kelisimshart jasaldy, sondaı-aq, «140-shy jóndeý zaýyty AQ-pen (Belorýssııa) jáne «Qazımpeks» JShS-men shart jasasý boıynsha kelissózder ótkizilýde. Jaqyn arada Qazaqstan Qarý­ly Kúshteriniń memlekettik qor­ǵanys tapsyrysy sheńberinde kásiporynmen aldaǵy óndiristik jáne tehnologııalyq úderisterdi ıgerý jáne óndiristik jospardy naqtylaý jóninde ústimizdegi jylǵa arnalǵan jumys júrgiziledi. Búginde «Semeı ınjınırıng» – «Qa­zaqstan ınjınırıng» AQ-tyń enshiles kásiporny. Ol brondy tank tehnıkasyn kúrdeli jóndeýden ótkizetin jáne konver­sııalyq tehnıkany daıyndaıtyn Qazaqstandaǵy birden-bir zaýyt bolyp tabylady. Onyń qyzmetiniń negizgi túrleri jaıaý áskerdiń ja­ýyn­gerlik mashınalaryn, brondy transporterlerdi kúrdeli, ortasha jáne reglamenttik jóndeý, tankterdi, jaýyngerlik barlaý-desanttyq mashınasyn, t.b. jóndeý bolyp tabylady. Kásiporyn, so­nymen qatar, T-72 tankterin jańǵyrtý, áskerı jáne áskerı-ınjenerlik tehnıkanyń bazasynda konversııalyq tehnıkany kúrdeli jóndeýmen jáne daıyndaýmen aınalysady. Búgingi kúni zaýytta 600-deı adam jumys isteıdi. «Egemen-aqparat».