«Qysqy kesh»

sulýlyq pen meıirimdilik saltanat qurdy A.Baıtursynov atyndaǵy memle­kettik ýnıversıtette dástúrli «Qys­qy kesh» oıyn-saýyq jáne bı keshi ótti. Bıyl tórtinshi ret ótip otyr­ǵan bul shara elimiz Táýelsizdiginiń 25 jyldyǵyna jáne Qostanaı obly­synyń 80 jyldyǵyna arnaldy. Onda stýdentterdiń 42 juby klassıkalyq, osy zamanǵy bılerdi bıleıdi, sony­men qatar, stýdentter oblystyń me­reı­li jyly bolǵandyqtan úshinshi bıdi «Qostanaı valsi» áýenimen bıledi. Sonymen qatar, «Qysqy kesh» bı keshinde ýnıversıtet stýdentteri úl­ken qaıyrymdylyq sharasyn da at­qardy. Qostanaı qalasynyń kishkentaı turǵyny 4 jasar Aısha Qabylbekova aýyr naýqasqa shaldyqqanyna 2 aıdan asa aıdaı ýaqyt boldy. Qulyndaı quldyrańdap oınap júrgen Aıshanyń júzine aranyn ashyp qarap turǵan ajaldy keıin serpýge stýdentter de qol­dan kelgen kómegin aıamaýǵa be­kindi. Aq qan aýrýyna shaldyqqan sábıdi emdetý úshin kóp mólsherde qar­jy kerek ekeni belgili. – Osy keshte Aıshanyń ertegisi úzilmesin, táýir bolyp ketsin degen úmit­pen «Ertegige saıahat» degen ataý­men jeti komanda jeti túrli ertegi qoı­dy. «Qysqy kesh» ótken orynǵa, ýnıver­sıtetke «Kómekke bar álemdi qos!» degen uranmen banner qoıdyq. Onda Aısha qaryndasymyz týraly, onyń shottary sekildi aqparat túgel berilgen. Endi repost jasaý ar­qyly Aıshaǵa kómek aksııasyn búkil álemge taratamyz, – deıdi ýnıver­sıtettegi Jastar bastamalaryn damytý orta­lyǵynyń dırektory Bolat Qalıev. – Stýdentterdiń bı keshi myńda­ǵan jastar bilim alyp jatqan ýnıver­sıtettegi tamasha dástúrdiń biri. Siz­der erteń elimizdiń mamany bolyp shy­ǵasyzdar. Al Táýelsiz eldiń báse­kege qabiletti jastary tek bilikti maman ǵana emes, jan-jaqty bolýy tıis. Ádemi sóıleý, ádemi kıiný, sulý bolý, bıleı bilý artyq etpeıdi, rýhanı azyq mamandy ósire túsedi, – dedi ýnıversıtet rektory Huseıin Hasenuly. «Qysqy keshte» bılegen bı jupta­rynyń, ertegi komandalarynyń óne­rin ta­razylaýǵa oblystaǵy bel­gili óner adam­dary da keldi. Biraq stýdent­ter­diń osynaý úlken sharasynda tek koman­dalar nemese bı juptary ǵana emes, dostyq, óner jáne meıirim men qaıyrym­dylyq jeńdi. Sulýlyq saltanat qurdy. Názıra JÁRIMBETOVA, «Egemen Qazaqstan». QOSTANAI.