Qazaq Ulttyq О́ner ýnıversıtetiniń «Shabyt» saraıynda Sh.Aımanov atyndaǵy «Qazaqfılm» AQ-nyń halyqaralyq deńgeıdegi úzdik kardıohırýrg, Ulttyq ǵylymı kardıohırýrgııa ortalyǵynyń basshysy Iýrıı Pıa týraly túsirgen «Júrekterdi qutqarý jolynda» atty tolyq metrajdy derekti fılminiń kórsetilimi ótti.
О́ziniń chehııalyq áriptesi Iаn Pırkpen birge Qazaqstanda 2012 jyldyń tamyz aıynda sozylmaly júrek jetimsizdigi bar pasıentke donorlyq júrekti alǵash ret transplantasııalaǵan Iýrıı Pıanyń esimi sol kezden bastap óz aýmaǵymyzdan asyp, Qazaqstannan tys jerlerde de úlken bedelge ıe bola bastaǵanyn kezinde otandyq basylymdar jarysa jazǵan bolatyn. Qazirgi tańda kardıohırýrg álemdik sapa standarttaryna jaýap beretin, Ortalyq Azııa aýmaǵyndaǵy birden-bir jetekshi kardıohırýrgııa ortalyǵy sanalatyn Ulttyq medısınalyq holdıng klınıkasy – Ulttyq ǵylymı kardıohırýrgııa ortalyǵyn basqarady. Aıta ketetin jaıt, Mádenıet jáne sport mınıstrliginiń tapsyrysymen Sh.Aımanov atyndaǵy «Qazaqfılm» AQ pen «Almatyfılm» stýdııasy birigip túsirgen ekrandyq týyndynyń rejısseri – Ońdasyn Tastanov.
Avtordan: «Belgili tulǵa týraly mundaı derekti fılmdi túsirýińizge ne sebep boldy? – dep suraǵanymyzda, ol: «Bul jerde men erekshe mamandyq ıesiniń halyqqa jasap jatqan mynadaı sheksiz qyzmetin shynaıy kórsetýge tyrystym. Dárigerlik kásiptiń mártebesin kóterý úshin túsirdim. Ulttyq ǵylymı kardıohırýrgııa ortalyǵyndaǵy qarapaıym aq jeleńdi abzal jandardyń biliktiligin jurtqa úlgi etýdi, otandyq medısınanyń jetistikteri damyǵan elderińizdikinen esh jeri kemshin soǵyp turmaǵanyn jetkizý edi», – dep tulǵa týraly fılm el damýy tarıhyn baıandaıtyn shejireden laıyqty oryn tabaryna sendirdi.
О́z kásibin aıryqsha súıetin kardıohırýrg Pıa jaıly fılm negizi eki sıýjetpen berilgen – dárigerlik qaıratkerligi jáne onyń em-domyna alǵash ıe bolǵandar taǵdyry. Munyń taǵy bir qyry, aq jeleńdi abzal jannyń ár sáti, ómirdegi tynys-tirshiligi naqty derekter arqyly kórinis tabady. Sonymen qatar, medısınanyń qyr-syry jaıynda kóp maǵlumat beriledi.
Fılmdi tamashalap otyrǵan kórermen donorlyqtyń qazirgi ómir úshin qanshalyqty mańyzdy ekendigin túsinedi. Damyǵan elderde oǵan múlde basqasha kózqaras qalyptasqan. Tipti, ol jaqta tolyq sheshimin tapqan másele deýge ábden bolady. Olardyń tólqujattarynda syrqatyna baılanysty nemese jazataıym jaǵdaıda kóz jumǵan adamdardyń ishki organdaryn transplantasııalaýǵa bolatynyn bildiretin arnaıy mór bar. Dáriger týraly fılmde keıipker osyny halyqqa durys jetkizgisi keledi.
Fılmnen keıingi kezdesýde dáriger osy oıyn taǵy da qaıtalap aıtty. «Elimiz álemniń damyǵan otyz eliniń qataryna qosylýdy kózdep otyrǵanda, mundaı túıtkildi kóp keshiktirmeı tezirek sheshýge tıispiz. Qymbat jobalar men tehnologııalardan tys qalyp qoımaýymyz kerektigin túsinemin, biraq transplantasııa jaıyn birjola sheshpesek, basqa eshbir áreketimizden túk ónbeıdi»,– dedi jýrnalısterge bergen suhbatynda kardıohırýrg.
Eske sala keteıik, Iýrıı Pıa 1981 jyly N.Pırogov atyndaǵy Máskeý memlekettik medısınalyq ýnıversıtetin oıdaǵydaı aıaqtaǵan soń, Týla qalalyq aýrýhanasynda alǵashqy mektepten ótken. Odaqtas respýblıkalar taraǵannan keıin dostarynyń keńesimen Túrkııaǵa baryp turýyna týra kelgen ol mundaǵy on jylda óte kúrdeli otalar jasaýdy úırenedi. Sóıtip, Elbasynyń shaqyrýymen elge óz kásibiniń naǵyz bilgiri, myqty hırýrg bolyp oralady.
Qarshyǵa KÚLEN.