Oblys ákimi Berdibek Saparbaevtyń óńir turǵyndary aldyndaǵy esebi bul joly ádettegideı ákimdikte emes, «Qonys» sport saraıynda ótti.
Berdibek Saparbaev óńir ekonomıkasyna álemdik ekonomıkada qalyptasqan keleńsiz úrdisterdiń saldary ońaı tımegendigin, alaıda, Elbasynyń «100 naqty qadam» baǵdarlamasynan týyndaıtyn mindetterdi júzege asyrýda júıelilik qalyptasqanyn tilge tıek ete kelip, oblystyq bıýdjettiń kirister boıynsha 105,3 paıyz oryndalǵanyn, naqty túsim 82,9 mıllıard teńge ornyna 87,3 mıllıard teńge quraǵanyn dálel retinde keltirdi. Osy kezeńde ónerkásip óniminiń kólemi 984,1 mıllıard teńge, naqty kólem ındeksi 95,6 paıyzdy quraǵan. Oblysta ónerkásip oryndaryn memlekettik qoldaýdyń 50,2 mıllıard teńge bolatyn sharalarynyń qabyldanýy daǵdarystyń saldaryn azaıtýǵa múmkindik bergen.
О́ńir basshysynyń baıandaýynsha, ındýstrııalandyrý kartasyna qurylys kezeńinde 13,4 myń jáne paıdalaný kezeńinde 12,8 myń jumys orny ashylatyn, quny 800,1 mıllıard teńgeniń 91 ınvestısııalyq jobasy engizilip, birinshi besjyldyqta 552,7 mıllıard teńgeniń 71 nysany iske qosyldy, 6,6 myń jańa jumys orny ashyldy. Osy baǵdarlamanyń ekinshi besjyldyǵynyń birinshi jyly 6,3 mıllıard teńgeniń 7 jobasy júzege asyryldy.
О́tken jyly oblys ekonomıkasyna 349,7 mıllıard teńge ınvestısııa tartylǵan. Bul 2014 jylǵa qaraǵanda sál azdaý. Degenmen, oblys ákimdigi ınvestısııalar tartý jáne oǵan qolaıly jaǵdaılar jasaýǵa basa kóńil bólýde. «Aktobe Invest-2015» ınvestısııalyq forýmy ótkizilip, onyń aıasynda kásipkerlik nysandarymen, qarjy ınstıtýttarymen 1,3 mıllıard AQSh dollaryna 12 memorandýmǵa qol qoıyldy. Injenerlik-kommýnıkasııalyq ınfraqurylymy bar «Aqtóbe» ındýstrııalyq aımaǵynyń qurylysy aıaqtaldy. Munda 10 iri jáne ortasha kásiporyndardy jáne 30-dan astam shaǵyn zaýyttardy ornalastyrý josparlanýda.
Osy kezeńde 142,7 mıllıard teńgeniń aýylsharýashylyq ónimderi óndirildi, fızıkalyq kólem ındeksi 103 paıyz boldy. Jyldyq qýaty 3 myń tonna kókónis qoımasy, 3 myń mal bordaqylaıtyn alań, 7 200 tonna et óńdeıtin kombınat paıdalanýǵa berildi. Aqtóbe, Qostanaı jáne Batys Qazaqstan oblystary ákimdikterimen jáne «InagalEurasia» kompanııasy basshylyǵynyń arasynda 100 mıllıon AQSh dollary shamasynda ınvestısııa salýdy kózdeıtin aımaqaralyq kooperasııa qurý jóninde memorandýmǵa qol qoıyldy. Bıylǵy jyly otbasylyq úlgidegi shaǵyn fermalar qurý boıynsha qanatqaqty jobalar qolǵa alyndy. Oǵan 2,5 mıllıard teńge qarastyrylǵan, bul 1,2 myń jańa jumys ornyn ashýǵa múmkindik beredi. Áleýmettik mańyzǵa ıe azyq-túlik ónimderine baǵany ustap turý úshin 628 bólshek jáne kóterme saýda nysandarymen 430 memorandýmǵa qol qoıyldy. Apta saıyn aýylsharýashylyq taýar óndirýshileriniń jármeńkeleri ótkizilip, olarda azyq-túlik qoljetimdi baǵamen usynylyp keledi, dedi Berdibek Máshbekuly.
Oblysta 50,2 myń shaǵyn jáne orta kásipkerlik nysany jumys isteıdi. Olar 344,0 mlrd. teńgeniń ónimin óndirgen. Bul salada 131,7 myń adam nemese oblystyń ekonomıkalyq belsendi turǵyndarynyń 30 paıyzy eńbek etýde. Bıyl kásipkerlik salasyn nesıelendirýge 1,8 mıllıard teńge qosymsha qoldaý kórsetý jolymen kásipkerlik salasyn damytý, olarda jumys isteıtinder sanyn 135 myń adamǵa ulǵaıtý josparlanýda.
О́tken jyly eldi mekenderdi gazben jabdyqtaýdyń 7 jobasy iske asyrylyp, oblys turǵyndarynyń gazben qamtylýy 83,7 paıyzdy qurady. Oblys turǵyndarynyń 90,5 paıyzy jáne eldi mekenderiniń 44,7 paıyzy ortalyqtandyrylǵan aýyzsýmen qamtamasyz etilgen. 2016 jyly «Nurly Jol» ınfraqurylymdyq damý baǵdarlamasy aýqymynda bul baǵytta jalpy somasy 4,0 mıllıard teńgege 12 joba júzege asyrylatyn bolady.
Oblys turǵyndaryn alańdatatyn másele joldardyń jaǵdaıy bolyp otyr. Bıylǵy jyly 95 shaqyrym joldy jańǵyrtý, kúrdeli jáne aǵymdaǵy jóndeýdi qamtamasyz etý, respýblıkalyq mańyzǵa ıe «Aqtóbe – Atyraý – RF shekarasy» baǵytyndaǵy 220-237 shaqyrym joldy jańǵyrtý jumystaryn jalǵastyrý, jol boıy servısin damytý qarastyrylýda.
2015 jyldyń qorytyndysy boıynsha, oblystaǵy qurylys jumystary 123,7 mıllıard, al barlyq qarjylandyrý kózi esebinen 536,2 myń teńgege oryndaldy. Bıyl 1500-ge jýyq otbasyn turǵyn úımen qamtamasyz etýge múmkindik beretin jalpy aýdany 180 myń sharshy metr kommersııalyq turǵyn úıdi paıdalanýǵa berý, turǵyn úı qurylys jınaq júıesi boıynsha 33,3 myń sharshy metr 2 nesıelik turǵyn úı qurylysyn aıaqtaý kózdelýde.
2015 jyly oblysta turǵyndardy jumyspen qamtý jospary 129,6 paıyz qurady, 21 myńnan astam adam jumysqa ornalastyryldy. Jumyssyzdyq deńgeıi 4,8 paıyzdy qurady, bul respýblıkalyq kórsetkishten tómen.
Oblys ákimi Berdibek Saparbaev mıkrofon arqyly berilgen turǵyndardy tolǵantqan saýaldarǵa jaýap qaıtardy. Buǵan deıin barlyq aýdandarda jáne kóptegen eldi mekenderde bolǵan isker ákim turǵyndar kótergen máselelerdiń birazyna burynnan qanyq ekenin ańǵartty. Sondyqtan da, túsken suraqtarǵa múdirmesten tııanaqty jaýap berdi. Turǵyndardyń kóbin tolǵantqan turǵyn úı alýǵa baılanysty saýaldardy tyńdaı kelip, aldaǵy ýaqytta jylyna 4,5-5 myń páter paıdalanýǵa beriletinin, olar kezektegilerge zańǵa sáıkes bólinetinin jetkizdi. Sondaı-aq, jerge baılanysty suraqtarǵa qazir qalada jer alýǵa 147 myń adam kezekte turǵanyn, tizimdegilerdi túgendep, zańdylyqty retteý qala ákimi Bekbol Saǵynǵa tapsyrylǵanyn, jylyna 2 myń adamǵa jer beriletinin málim etti.
Oblys ákimi gaz, aýyzsý jáne jolǵa baılanysty máselelerdiń de maqsatty baǵdarlamalarǵa sáıkes qarjynyń múmkindigine qaraı sheshiletinin qadap aıtty.
Esepti kezdesýge deıin de qabyldaý jáshikterine, ákim blogyna jáne saıtqa 139 suraq túsken eken, endi óńir basshysy esepti kezdesýde qoıylyp úlgerilmegen saýaldardy qosyp, jýyq arada oblystyq gazetter arqyly jaýap berýge ýáde berdi. Qoryta aıtqanda, búginde el halqyna tanymal tulǵaǵa aınalǵan Berdibek Saparbaevtyń esebi bul azamattyń basshylyǵymen Aqtóbe jerinde jasalar jumys mol bolatynyna sendirdi.
Satybaldy SÁÝIRBAI,
«Egemen Qazaqstan».
Aqtóbe oblysy.