ASTANA. 1 naýryz. Búgin qazaqstandyq alpınıster Maqsut Jumaev, Maǵjan Saǵymbaev jáne Ivan Boroda Ońtústik Amerıka qurlyǵyndaǵy eń bıik núkte – Akonkagýa shyńyn (Argentına) baǵyndyrdy. Astana ýaqytymen saǵat tańǵy 4:00 shamasynda alpınıster baılanysqa shyǵyp, qýanyshty habardy jetkizdi. Bul týraly Qazaqstan geografııalyq qoǵamynyń málimetine silteme jasaǵan egemen.kz tilshisi habarlady.
Atalǵan qoǵamnyń facebook áleýmettik jelisindegi resmı paraqshasynda jarııalanǵan jazbada: «Alaqaı! Qazaq geografııalyq qoǵamy ekspedısııasynyń Akonkagýadaǵy komanda músheleri Maǵjan Saǵymbaev pen Maqsut Jumaev teńiz deńgeıinen 6962 metr bıiktikte ornalasqan shyńdy baǵyndyrdy! Elimizdiń, Qazaqstannyń týy men Qazaq geografııalyq qoǵamynyń týy Ońtústik Amerıkanyń eń bıik jerine tigildi! Alǵa Qazaqstan!», – delingen.
Aıta keteıik, osydan eki apta buryn alpınısterimiz atalǵan shyńdy baǵyndyrý úshin ekspedısııaǵa shyqqan bolatyn. Ushaqpen Argentınanyń Mendosa qalasyna jetken olar sol jerden kózdegen maqsattaryn iske asyrý úshin jolǵa shyqty.
Maqsut Jumaev tek Qazaqstannyń emes, álemniń biregeı alpınısi ekenin erekshe atap ótken jón. Ol Jer betinde 8000 metrden asatyn barlyq 14 shyńdy qosymsha ottegisiz baǵyndyrǵan álemdegi 12 alpınıstiń biri.
Elaman Qońyr.
Derek: Qazaq geografııalyq qoǵamy.
Sýret: facebook.com.