ASTANA. 12 naýryz. Soltústik Koreıa áskerıleri osy aptanyń basynda óziniń súńgýir qaıyqtarynyń birin joǵaltyp aldy. Bul týraly ras.kz-ke silteme jasaǵan egemen.kz tilshisi habarlady.
CNN telearnasynyń habarlaýynsha, muny Amerıkanyń osynyń jaıynan habarlary bar úsh laýazymdy tulǵasy jetkizgen. AQSh áskerıleri osy ýaqyttarda Soltústik Koreıanyń shyǵys jaǵalaýynan súńgýir qaıyqtyń júzip shyqqanyn baqylaýda ustap otyrǵan. Bir kezde sý asty kemesi ózinen ózi toqtap qalǵan. Osydan keıin AQSh-tyń tyńshy spýtnıkteri, ushaqtary men korablderi KHDR flotynyń joǵalǵan sýbmarındi qalaı izdegenin birneshe kún boıy baqylap turǵan.
Qurama Shtattar joǵalǵan qaıyqtyń taǵdyry jóninde naqtyly málimet bilmeıdi. Onyń dreıfke tap kelgeni ne sý astyna batyp ketkeni ázirge belgisiz. Amerıka áskerıleriniń boljamy boıynsha, jattyǵý kezinde súńgýir qaıyq tehnıkasy isten shyǵyp qalǵan bolýy da múmkin.
Aımaqta qazirgi kúnderi AQSh pen Ońtústik Koreıanyń keń aýqymdy áskerı jattyǵýlary júrip jatyr. Osyǵan baılanysty Phenıan munyń aldynda óz qaýipsizdigine zalal keletin bolsa, Seýl men Vashıngtonǵa preventti ıadrolyq soqqylar beretinin málimdegen bolatyn.
Talǵat Raıymbek.
Derek: ras.kz.
Sýret: serke.org.