ALMATY. 14 naýryz. Almatydaǵy Ǵabıt Músirepov atyndaǵy qazaq memlekettik akademııalyq balalar men jasóspirimder teatrynda tuńǵysh ret «Altyn saqa» atty balalar spektaklderiniń festıvali ótedi. Bul týraly teatrdyń baspasóz qyzmetine silteme jasaǵan egemen.kz tilshisi habarlady.
Osylaısha, teatrdyń 70 jyldyq mereıtoıy qarsańynda, alǵash ret «Altyn saqa» atty balalar spektaklderiniń festıvali uıymdastyrylǵaly otyr.
Festıvalda Baıdildá Qaltaev atyndaǵy «Eń úzdik er adam beınesi úshin», Aqqaǵaz Mámbetova atyndaǵy «Eń úzdik áıel beınesi úshin», Qasym Jákibaev atyndaǵy «Eń úzdik qosalqy róldegi er adam beınesi úshin», Ámıná О́mirzaqova atyndaǵy «Eń úzdik qosalqy róldegi áıel beınesi úshin», «Eń úzdik epızodtyq ról», «Epızodtyq róldegi akterlik sheberligi úshin», «Kórermender kózaıymy», «Eń úzdik debıýt» nomınasııalary boıynsha marapattaý rásimi ótkiziledi.
Osy bastamaǵa oraı, 24 naýryz kúni Ǵabıt Músirepov atyndaǵy qazaq memlekettik akademııalyq balalar men jasóspirimder teatrynyń dırektory Sábıt Ábdiqalyqov, teatrdyń kórkemdik jetekshisi, eńbek sińirgen artısi Murat Ahmanov, Qazaqstannyń halyq artısi Roza Áshirbekova jáne ádebıet bólimi meńgerýshisi Baqyt Bedelhan baspasóz máslıhatyn ótkizip, BAQ ókilderine suhbat beredi.
Aınash Esalı.
Derek, sýret: Ǵabıt Músirepov atyndaǵy qazaq memlekettik akademııalyq balalar men jasóspirimder teatrynyń baspasóz qyzmeti.