Erteń saıası partııalar arasynda pikirsaıys ótedi

Keshe Ortalyq saılaý komıssııasynyń oty­rysy ótti. Onda 2016 jylǵy 16 naýryzda «Habar» tele­arnasynda Parlament Májilisiniń depýtattaryn saılaýǵa qatysatyn saıası partııalardyń pikirsaıysyn ótkizý týraly qaýly qabyldandy jáne ony ótkizýdiń reglamenti bekitildi. Ortalyq saılaý komıssııasynyń múshesi Lázzat Súleımenniń sózine qaraǵanda, pikirsaıysqa qatysý úshin saılaýǵa qatysýshy árbir saıası partııadan bir ókilden shaqyrylady. Qatysýshylar jeke basty qaralaýdan, saıası partııanyń, onyń músheleriniń namysyna, abyroıy men iskerlik bedeline kórineý nuqsan keltiretin sóz aıtýdan, basqa saıası partııalardyń ókilderin kemsitýden aýlaq bolyp, jalpyǵa birdeı qabyldanǵan ádep normalaryn saqtaýǵa tıis. «Elimizdiń konstıtýsııalyq qury­lysyn kúshtep ózgertýdi, onyń tutas­tyǵyn buzýdy, memleket qaýip­sizdigine nuqsan keltirýdi, áleýmettik, násildik, ulttyq, dinı, tektik-toptyq jáne rýlyq araz­dyqty qozdyrýdy, qatygezdik pen zorlyq-zombylyqqa bas urýdy, sondaı-aq, zańnamada kózdelmegen áske­rı­len­dirilgen quralymdar qurýdy nası­hattaýǵa jáne úgitteýge jol beril­meıdi. Pikirsaıys ýaqyty 90 mınýtqa sozylýy múmkin», – dedi ol osyǵan qatysty. Otyrysta Ortalyq saılaý komıssııasy «2016 jylǵy 20 naýryzǵa taǵaıyndalǵan Qazaqstan Respýblıkasy Parlamenti Májilisi depýtattarynyń kezekten tys saılaýyna jáne máslı­hattary depýtattarynyń kezekti saılaýyna halyqaralyq uıymdar men shet memleketterdiń baıqaýshylaryn akkredıtteý týraly» qaýly da qabyl­dady. Atalǵan qaýlyǵa sáıkes Ortsaı­laýkom Qazaqstan Respýblıkasy Syrtqy ister mınıstrliginiń usynýy boıynsha saılaýdy baıqaý jónindegi eki mıssııanyń, eki halyqaralyq uıymnyń jáne 29 shet memlekettiń taǵy 207 baıqaýshysyn akkredıttedi. Olardyń ishinde EQYU/DIAQB mıssııasynyń 89 baıqaýshysy, TMD mıssııasynyń 8 baıqaýshysy, Eýropa Keńesiniń Parlamenttik Assambleıasynan 14, Túrkitildes elder yntymaqtastyǵy keńesi­nen 17 jáne shet memleketten 79 baıqaýshyny akkredıttedi. «2016 jylǵy 14 naýryzdaǵy jaǵdaı boıynsha Ortsaılaýkom Syrtqy ister mınıstrliginiń usynýy boıynsha halyqaralyq uıymdar men shet memleketterdiń barlyǵy 815 baıqaý­shysyn akkredıttedi, – dedi OSK múshesi Tatıana Ohlopkova. – Olardyń ishinde EQYU/DIAQB-nyń 286 baıqaýshysy, TMD mıssııasynyń 301 baıqaýshysy, Shanhaı yntymaqtastyq uıymynyń mıssııasynan 9, EQYU Parlamenttik Assambleıasynan 75, Eýropa Keńesiniń Parlamenttik Assambleıasynan 14, Túrkitildes elder yntymaqtastyǵynyń Keńesinen 17, Islam yntymaqtastyǵy uıymynan 3, Túrkitildes elderdiń Parlamenttik Assambleıasynan 8, shet memleketterden 102 baıqaýshy bar». Budan basqa Qazaqstan Respýblıkasy Syrtqy ister mınıstrligi 29 memleketten sheteldik BAQ-tyń 140 ókilin akkredıttegen. Osylaısha, qazirgi ýaqytta 955 halyqaralyq baıqaýshy men sheteldik buqaralyq aqparat quraldarynyń ókili akkredıttelip otyr. *** Keshe Ortalyq saılaý komıs­sııasynyń baspasóz ortalyǵynda TMD baıqaýshylary mıssııasy shtabynyń jetekshisi Evgenıı Sloboda jýrnalıs­terge brıfıng ótkizip, elimizde saılaý úderisi qalaı ótip jatqanyn aıtyp berdi. «Biz oblystarda bolyp, aýmaqtyq, ýchaskelik saılaý ýchaskeleriniń jumys­tarymen tanystyq. Olarda aıtarlyqtaı buzýshylyqtar baıqala qoıǵan joq, – dedi ol. – Ádistemelik qamtamasyz etý turǵysynan alyp qaraǵanda, bári durys, qujattardy rásimdeýde de kemshilikter baıqalmaıdy. Son­dyq­tan, ázirshe bizdiń tarapymyzdan esh saýal joq. Birqatar azyn-aýlaq kemshilik baıqaldy, ol barlyq elderde de kezdesedi. Máselen, saılaý ýchaskelerine barǵan kezde daýys berý úderisin baıqaýǵa múmkinshilikter bolýy tıis. Sol sebepti biz birqatar saılaý ýchaskesine daýys berýge arnalǵan kabınalardy jyljytýdy usyndyq». Álısultan QULANBAI, «Egemen Qazaqstan». Sýretti túsirgen Erlan OMAROV.