Taıaýda Aqsýat aýylynda óner mektebi ashyldy. Bilim ordasynyń jalpy alańy – 200 sharshy metr. Aýdan ákimdiginiń qoldaýymen ashylǵan mektepte sýret, keskindeme, músin, qoldanbaly kompozısııa jáne kompozısııa synyptary boıynsha 100 bala bilim alady. Balalardyń boıyndaǵy qabiletin shyńdaý maqsatynda tusaýyn kesken mektepke oqýshylar 5 jastan bastap qabyldanady. Arnaıy mektepti bitirgen oqýshylarǵa kýálik te beriledi eken. О́ner besiginiń ashylý saltanatyna aýdandaǵy mádenıet salasynyń qyzmetkerleri, mektep oqýshylary men ata-analar, aýyl turǵyndary qatysty.
– Aýylymyzdyń balalary basqalardan kem bolmaýy tıis. Iri qalalardyń jobasyna úles qosatyn sáýletshiler, halyqaralyq dárejede kórmeler ótkizetin sýretshiler, dańqty músinshilerdiń kóbi aýyldan shyǵady. Búginde Astananyń qandaı qarqynmen damyp kele jatqany barshamyzǵa belgili. Bolashaqta elordamyz ben elimizdiń estetıkalyq turǵydan damýyna tarbaǵataılyq órender de óz qoltańbasymen úles qosady degen senimdemiz. Aqsýatta óner mektebinen ózge saz, sport mektepterinde de tálim alýǵa bolady. Aldaǵy ýaqytta aqyly negizdegi aǵylshyn tili men mentaldy matematıka mektepterin ashýdy josparlap otyrmyz. Iаǵnı, balalardyń bos ýaqytyn tıimdi jumsaýy úshin memleket barlyq jaǵdaıdy jasaýda, – dedi jańa nysannyń ashylýymen quttyqtaǵan aýdan ákimi Dildábek Orazbaev.
Aýdan basshysynyń aıtýynsha, aldaǵy ýaqytta Aqsýat óner mektebi oqýshylarynyń áleýeti týǵan jerdi kórkeıtýge paıdalanylmaq. Máselen, daryndy oqýshylar aýdandyq gazette jarııalanatyn baıqaýlarǵa qatysyp, aýdan ortalyǵy men aýyldyq okrýgterdi kóriktendirý sharalaryna úles qosa alady. Osy maqsatta ortalyq saıabaqtar men kóshe jıekterin, alańdaǵy mýzykalyq túrli-tústi sýburqaqtar aınalasyn ásemdendirýge baılanysty jobalar synǵa túsetin kórme uıymdastyrý kózdelip otyr. Oqýshylardyń shyǵarmashylyq qııalynan týǵan jumystar osy kórmege qatystyrylatyn bolady.
Mekteptiń ashylý saltanatynda Aqsýat aýylynyń Alshynǵazy Baıqydyrov atyndaǵy saz mektebinde uzaq jyl eńbek etken Sholpan Boshanova men «Sulýsaz» halyqtyq mádenı án-bı ansambliniń kórkemdik jetekshisi Ǵarıfolla Seıfollaev arnaıy tósbelgimen marapattalsa, ardager-ustaz Handanısha Myrzataeva búginde shákirtterdiń alańsyz bilim alýyna, shyǵarmashylyq qabiletin shyńdaýyna memleket tarapynan barlyq jaǵdaı jasalǵanyn, ony tıimdi paıdalaný kerektigin jetkizdi. Jańa nysanmen tanysý barysynda beıneleý óneri sabaǵyn ótkizip jatqan muǵalimdi sózge tartqan edik. Janerke Erlanova Semeıdiń servıs kolledjin támamdap, «Dıplommen – aýylǵa!» jobasy boıynsha aýylǵa kelip, eńbek etip jatqanyn aıtty.
– Bizdiń úıirmede qazir 25 oqýshy bar. Olardy sýret, kompozısııa, grafıka ónerine baýlımyz. Túrli-tústi boıaýmen jumys isteýdi úıretemiz. Oqýshylardyń beıneleý ónerine degen yntalary óte joǵary, – dedi jas maman.
О́ner mektebiniń dırektory Erbolat Jarylǵasynov ónerli jan eken. Aǵash pen temirden túıin túıetin ustazdyń jasaǵan qolóner buıymdarynyń ishinde dombyra, narqobyzdan bastap, astaý, kise syndy ulttyq buıymdar jeterlik. Keńes Odaǵy kezinde aýyldaǵy óner mektebiniń negizin qalaǵan, 30 jyl boıy ustazdyq, basshylyq qyzmet etken Maıdanbek Ishtebaev Erbolattyń qolynan shyqqan dombyrany bebeýletip, kúı tarta otyryp, Aqsýattaǵy alǵashqy óner mektebi 1968 jyly 15 tamyzda ashylǵanyn, atalǵan bilim ordasynan kúıshi Murat Ábýǵazy, ánshi Klara Tólenbaeva, sybyzǵyshy Talǵat Muqyshev syndy elimizge belgili óner qaıratkerleri shyqqanyn maqtanyshpen atap ótti. Olardyń izin jalǵaıtyn ónerpazdar osy órenderdiń ortasynda otyrǵan bolar, bálkim!
Dýman ANASh,
«Egemen Qazaqstan».
Shyǵys Qazaqstan oblysy,
Tarbaǵataı aýdany.
Sýretti túsirgen avtor.