Parlament Senaty Tóraǵasynyń orynbasary Asqar Beısenbaev Túrkitildes memleketter Parlamenttik Assambleıasynyń baıqaýshylar mıssııasy ókilderimen kezdesti, dep habarlady Senattyń baspasóz qyzmeti.
Tóraǵa orynbasary TúrkPA Bas hatshysy Jandos Asanov, Túrkııadaǵy Uly Ulttyq Jınalysynyń depýtaty Halıýk Ipek, Erkan Aıdyn, Ázerbaıjan Mıllı Medjılısiniń depýtaty Nızamı Jafarov, Qyrǵyzstan Jogorký Keneshiniń depýtaty Abylkaıyr Uzaqbaev jáne taǵy da basqa mıssııa ókilderimen kezdesýde 20 naýryzda ótetin kezekten tys saılaýdyń Qazaqstan halqy úshin mańyzy zor, erekshe saıası shara ekenin atap ótti.
«Qazaqstan qazir jańǵyrý kezeńge aıaq basty. Biz álemdegi kúrdeli ahýal jaǵdaıynda jańa reforma ótkizý arqyly elimizdegi birlikti, turaqtylyqty saqtaýǵa aldyn ala qadam jasaýdamyz», – dedi A.Beısenbaev.
«Memleketimizdiń aldynda turǵan joǵary maqsat-mindetterdi oryndaýda, eń aldymen, sapaly zań shyǵarý qyzmetin atqara alatyn bilikti ári tájirıbeli el qalaýlylaryna úlken úmit artylatynyn» aıtqan A.Beısenbaev: «Biz saılaýdy ashyq jáne demokratııalyq saılaýdyń jalpyǵa tanymal halyqaralyq qaǵıdattaryna saı ótkizýge umtylamyz. Sondyqtan da, biz saılaýǵa halyqaralyq baıqaýshylardyń barynsha keńinen jáne belsendi qatysýlaryn quptaımyz. Baıqaýshylardyń jumysyna qolaıly jaǵdaı jasalatyn bolady. Aldaǵy saılaýǵa baǵa berýde sizderdiń kásibı biliktilikterińiz ben ádil ári beıtaraptylyqtaryńyzǵa senim artamyz», – dedi.