Shetelderdegi otandastarymyz da tańdaýlaryn jasady

Keshe, jeksenbi kúni Qazaqstan Respýblıkasy Parlamenti Májilisi men barlyq deńgeıdegi máslıhattar depýtattarynyń saılaýy tek bizdiń elimizdi ǵana emes, sonymen qatar álemniń 65 elin qamtydy. Dálirek aıtqanda, planetanyń osynshama memleketinde saılaý ýchaskeleri ashylyp, olardaǵy qazaqstandyq azamattardyń saıası naýqanǵa ún qosýlaryna múmkindik jasaldy. Qazaqstan Respýblıkasy Syrtqy ister mınıstrliginiń málimeti boıynsha, osy saılaý ýchaskelerindegi saılaýshylar tizimine 14 myńǵa jýyq azamattarymyz engizilgen. Tokıo. Qa­zaq­stan depýtattaryn saılaýǵa ar­nalǵan naýqan Ja­ponııa astanasynda bastaldy. Osy qaladaǵy Qa­zaqstan elshiligi ǵımaratynda qa­nat jaıǵan №211 saılaý ýchaskesi birinshi bolyp ashyldy. Kúnshyǵys elinde bizdiń bul naýqanǵa 116 Qazaqstan azamaty qatysty. Olardyń qataryn japon elindegi joǵary oqý oryndarynda bilim alyp jatqan stýdentter men munda jergilikti kompanııa­larda tájirıbeden ótýge kelgen jumysshylar qurady. Jalpy, ýaqyt aıyrmashylyǵyna baılanysty bizdiń azamattarymyz eń birinshi bolyp Tokıo men Seýlde ashylǵan saılaý ýchaskelerinde daýys bere bastaǵan. Olar ýchaskege kelip jatqan kezde Astana ýaqyty tańǵy 4:00-di kórsetip turǵan. Beıjiń. Qytaıda bizdiń saılaý ýchaskelerimiz birden 4 qalada jumys jasady. Ondaı mekender eldiń baıtaǵy – Beıjińnen basqa, Shanhaı, Gonkong jáne Úrimshi qalalarynda boldy. Olarda Aspanasty elinde oqyp jatqan stýdentter, sondaı-aq Qazaqstannan barǵan týrıster men kásipkerler aıryqsha belsendilik tanytty. Aıtalyq, Beıjińde Qazaqstan elshiligi ǵımaratynda ashylǵan №207 saılaý ýchaskesindegi saılaýdy dıplomatııalyq ókildik basshysy Shahrat Nuryshev pen onyń zaıyby bastap berdi. Olar Qazaqstan gımni oınalyp bitken boıda bıýlletenderin alyp, arnaıy kabınaǵa bettedi. Bulardyń sońyn ala Qytaı elinde jumys saparymen júrgen Qazaqstan Aýyl sharýashylyǵy vıse-mınıstri Gúlmıra Isaeva men osy vedomstvonyń qyzmetkerleri, dıplomattar, olardyń otbasy músheleri, ulttyq kompanııa ókilderi ózderiniń konstıtýsııalyq quqyqtaryn oryndap shyqty. Osy alǵashqylardyń qatarynan Beıjiń til jáne mádenıet ýnıversıtetiniń til kýrsynda oqıtyn 18 jasar stýdent Ká­mı­lá Atıeva da tabyldy. Saılaýda birin­shi ret daýys berip turǵandyqtan, oǵan saılaý komıssııasy tarapynan este­likke arnaıy kádesyı tapsyryldy. Budan ári Qytaı jerine qyzmettik máselelermen kelgen Juldyzbek Se­ralıev te atalmysh ýchaskede daýys berý múmkindigin paıdalana bildi. Shanhaı yntymaqtastyq uıymy bas hatshysynyń orynbasary Sabyr Imandosovtyń zaıyby Mánsııa Imandosova da estelikke syılyq aldy. Ol saılaý ýchaskesiniń jumysynyń uıymdastyrylýy joǵary deńgeıde ekenin atap ótti. Beıjińde alǵashqy bolyp daýys berýshiler qatarynda munda budan bir kún buryn jumys saparymen kelgen «Egemen Qazaqstan» gazeti ınternet-redaksııasynyń qyzmetkerleri Serikqazy Kákibalanov pen О́rken Musabek te boldy. Ýlan-Bator. Qazaqstannyń Moń­ǵolııadaǵy elshiligi ishinen tý tikken № 231 saılaý ýchaskesi de kelý­shiler leginen bosaǵan joq. Munda da bizdiń otandastarymyz úlken uıym­shyldyq tanytty. Sonyń ishinde ótken jyly maýsym aıynda ǵana Qa­zaqstan azamattyǵyn alyp, bizdiń respýblıkamyzdyń qurama komandasy atynan álemdik deńgeıdegi jarys­tarǵa qatysa bastaǵan dzıýdoshy mońǵol qyzy Otgonseseg Galbad­rahty kórý kim-kimge de óte jaqsy áser etti. Sportshy boıjetken munda jáne Qazaqstan quramasynyń sporttyq kıimin kıip keldi. Daýys berip shyqqannan keıin qazaqstandyq mońǵol qyzy jýrnalıs­terge qazir ǵana Rıo-de-Janeırodaǵy Olımpııalyq oıyndarǵa baratyn komanda quramyna bekitilgenin qýana jetkizdi. Qazaqstanda Shymkent qalasynyń turǵyny bolyp tabylatyn ol bıylǵy aqpan aıynyń basynda Parıjde ótken «Úlken dýlyǵa» týrnırinde 48 kıloǵa deıingi salmaqta sensasııalyq jeńiske jetken edi. Sosyn aqpannyń ortasynda Germanııanyń Dıýsseldorf qalasynda Álem Gran-prıi jarysynda kúmis medaldy moınyna taqty. Mońǵolııanyń bas qalasynda saılaý ýchaskesine birinshi bolyp qazaqstandyq kásipker Igor Moıseev jetti. Al eń jas saılaýshy retinde 18 jastaǵy Zalına Kotıeva atap ótildi. Munda barlyǵy tizimdegi 112 adam ýaqytynda daýys berip boldy. Máskeý. Reseı astanasynda turatyn nemese osynda issaparmen kelip qalǵan Qazaqstan azamattary elimiz elshiligi janyna ornalasqan № 215 saılaý ýchaskesinde daýys berýge atsalysty. Reseı Federasııasynyń alýan túrli BAQ-tary jazyp otyr­ǵan­daı, munda daýys berýge kelgen otan­dastarymyzdyń barlyǵynyń kóńil-kúıleri kóterińki bolǵan. Solardyń arasyndaǵy kásipker Erkebulan Baıahmetov bul saılaýdyń elimiz azamattarynyń jaýapty azamattyq ustanymdaryn baıqatqanyn erekshe atap ótti. Onyń paıymynsha, saılaý ýchaskesine kelgenderdiń barlyǵy ózderiniń eldiń damýyna úles qosyp jatqandaryn sezine bilgen. «Biz de Qazaqstannan keldik. Máskeýde issapardamyz. Soǵan qaramastan erte turyp, óz tańdaýmyzdy jasaý úshin saılaý ýchaskesine bardyq. Bul – el úshin mańyzdy, qajetti másele», – dedi «Damý» kásipkerlikti damytý qorynyń» Aqmola oblysyndaǵy fılıalynyń dırektory. Tashkent. О́zbekstandaǵy Qa­zaq­stan elshiligi úıinde ornalasqan № 217 saılaý ýchaskesi 200-den as­tam saılaýshynyń daýys bergenin aıǵaq­tady. Munda naýqan jergilikti ýaqyt boıynsha 6:00-de ashylǵan. Al daýys berý 7:00-de bastalǵan. Saı­laý ýchaskesi komıssııasynyń tór­aǵasy Naýryz Aıdarovtyń aıtýynsha, elshilikte konsýldyq eseptegi Qazaq­stan azamattary belsendi túrde daýys berýge kirisken. «Saılaýǵa úlken daı­yndyq júrdi. Qyzmetkerler óńirlerge shyǵyp, azamattarmen kezdesti, saılaýǵa qatysýǵa shaqyrdy», – dep málimdedi dıplomat. Buǵan qosa, tapsyrys hattarmen óńirdegi Qazaqstan azamattaryna shaqyrtý jiberilgen. Sondaı-aq, Ortalyq saılaý komıssııasynyń materıaldary, bıýlleten toltyrý tártibi, aqparattar tıisti úlgide qabyrǵaǵa ilingen. «Daýystardy esepteý 20.00-de daýys berý rásimi aıaqtalǵannan keıin júzege asyrylady, zańǵa sáıkes hattama elshilik stendine ilinedi», – dep sózin túıindedi komıssııa tóraǵasy. Ankara. Túrkııada Qazaqstan Par­la­menti Májilisi men barlyq deń­geı­degi depýtattarynyń saılaýy úsh qalada óris alǵan. Olar el­diń ortalyǵy – Ankaradan basqa, Ys­tam­bul jáne An­talıa shaharlarynda jumysqa kirisken. Sóıtip, Anadoly jerindegi № 205, № 236 jáne № 246 saılaý ýchas­kelerine daýys berýshiler jer­gilikti ýaqyt boıynsha 7:00 saǵatta kele bastaǵan. Týra sol mezgilde birin­shi bolyp kelgen Qazaqstan azamattarynyń qatysýymen saılaý ýchaskeleriniń ashylý rásimi uıym­dastyrylǵan. Túrkııada óz daýysyn birin­shi bolyp Qazaqstannyń osy elde­gi Tótenshe jáne ókiletti elshisi Jan­seıit Túımebaev bergen. «Qazaqstan azamattary Túrkııa elin­degi kúrdeli ishki jaǵdaıǵa qara­mas­tan, Parlament Májilisiniń kezek­ten tys saılaýynda ózderiniń daýys berý konstıtýsııalyq quqyǵyn paıdalaný úshin saılaý ýchaskelerine kelip jatyr», – delingen habarlamada. Túrkııadaǵy qazaqstandyq saı­laý­shylardyń basym bóligin osy elde bilim alyp jatqan jastar quraıdy. Olardyń arasynda áskerı mamandyqtar boıynsha oqyp jatqan kýrsanttar da júr. Saılaý ýchaskelerine Túrkııanyń túrli qalalaryndaǵy joǵary oqý oryndarynyń stýdentteri men doktoranttary da kelgen. Elde mundaı 1500-den astam ókil bar. Daýys bergender qatarynda Túr­kııadaǵy belgili tulǵa, otandasymyz Marat Ahmet te bolǵan. Ol – Túrkııa Prezıdentiniń qolynan joǵary ǵylymı marapat alǵan matematık-ǵalym. Túrkııada 1998 jyldan beri ǵylymı zertteýler júrgizip keledi. Matematıka ǵylymdarynyń doktory, professor, Túrkııada jáne kóptegen shetelderge tanymal tulǵa. Mundaı daýys berýshiler legin sondaı-aq osy elde jumys istep júrgen ǵalymdar, jýrnalıster, oqytýshylar, dárigerler toltyrǵan. Baký. Ázerbaıjandaǵy Qazaqstan Parlamenti Májilisine depýtattar saılaý eldiń bas qalasynda júr­gi­zildi. Ol da Qazaqstannyń osy eldegi elshiliginen ashyldy. № 212 saılaý ýchaskesiniń basshysy Baýyrjan Dos­man­betovtiń málimetinshe, bizdiń elimizdiń saılaýshylar tizimine kir­gen azamattary túgel ózderiniń konstı­týsııalyq quqyqtaryn oryndaǵan. Ábý-Dabı. Birikken Arab Ámir­likterinde de saılaý ýchaskesi qyzý jumys jasady. Partııalyq tizim boıynsha Qazaqstan Parlamenti Májilisine depýtattardy kezekten tys saılaý ótkizýine baılanysty Dýbaıdaǵy jáne Soltústik Ámirliktegi Qazaqstannyń bas konsýldyǵy ǵıma­ratynda № 224 saılaý ýchaskesi ashyl­ǵan. Ýchaskede BAÁ-de turaqty turatyn jáne túrli sebeptermen arab elinde júrgen 600-ge jýyq qazaqstandyq azamat konstıtýsııalyq quqyqtaryn júzege asyrǵan. Ýchaske tańerteń jergilikti ýaqyt boıynsha saǵat 7.00-de ashyldy. Al bul elde jeksenbi jumys kúni sanalady. Ashylý saltanaty barysynda Qazaqstan Respýblıkasynyń gımni oryndalǵan. Budan keıin Dýbaıda bilim alyp jatqan qazaqstandyq stýdentter men týrıster osynda qaraı aǵylǵan. Jalpy, Ámirlikke jylyna 300 myńnan astam qazaqstandyq týrıs­ter kelip, tynyǵady eken. Joǵaryda aıtqanymyzdaı, álemniń budan da basqa kóptegen qalalarynda bul kúni Qazaqstan Parlamenti Májilisiniń saılaýy ótkizildi. Sheteldik BAQ-tar málimetteri boıynsha materıaldy daıyndaǵan Serik PIRNAZAR, «Egemen Qazaqstan».