Birliktiń úlgisin kórsetti

Jyldyń basty saıası naýqany óz máresine de jetti. Saılaý barysy qalaı ótti? Oǵan qyzylordalyqtar qalaı atsalysty? Osy tektes suraqtardy Saılaýdy baıqaý jónindegi respýblıkalyq qoǵamdyq komıssııanyń Qyzylorda oblysy boıynsha óńirlik ortalyǵynyń tóraǵasy Maqsut DOSJANOVQA qoıdyq. – Búgingi saılaýdaǵy qyzyl­ordalyqtardyń belsendiligi qandaı? –Qyzylorda qalasy jáne jeti aýdan boıynsha saılaý ýchaskeleri tańǵy saǵat 7-de óz jumystaryn bastap ketti. Aımaqtaǵy 325 saı­laý ýchaskesinde saılaý­dy baqylaıtyn qoǵamdyq ko­mıs­sııasynyń ókilderi óz kýá­likterimen, ádistemelik nus­qaý­larymen jumystaryna kiristi. Aıta keteıin, baıqaýshylar qa­taryna eń belsendi, jaýapty azamattar men jastar tartyldy. Barlyq saılaý ýchaskelerinde baıqaýshylar úshin aldyn ala semınar-trenıngter ótkizildi. Jalpy, jú­ıeli jumystyń nátıjesinde ótken saılaýdy tolyq nazarda ustaı bildik. Jeksenbi kún bol­ǵandyqtan ba, tańǵy saǵat 9-ǵa deıin saılaý ýchaskelerine daýys berýshiler aǵy­lyp keldi. Sodan soń bir jarym sa­ǵattaı adam aıaǵy az-maz basyl­dy. Al saǵat on jarymnan keıin daýy­s berýshilerdiń sany qaıtadan kóbeıdi. Saı­laý ýchaskelerinde baıqaýshylarǵa bar­lyq jaǵdaı ja­salǵan. Bir qýan­tar­lyǵy, bizdiń elimizde saı­laý merekege aı­nal­ǵan desek, artyq aıt­qandyq emes. Osy jolǵy saı­­laý da me­rekelik kóterińki kó­ńil-kúımen ótti. Osy­ǵan qarap, ha­lyq­tyń saılaýǵa qa­tysý belsendiligin baıqaýǵa bolady. Oblys boıyn­sha 400 myńnan astam saılaý­shy tirkelgen. Saılaýdyń qorytyndysy boıynsha bizdiń óńir belsendiligi jaǵynan respýb­lıkada aldyńǵy qatarda kórinedi dep oılaımyn. Keleshektiń kemel bolýy – eldiń tańdaýy men birligine baılanysty. Osy rette, syrboıylyqtar eldik pen birliktiń úlgisin kórsetýde. – Saılaýdyń Naýryz mere­kesimen tuspa-tus kelýi de jaq­­sylyqtyń nyshany emes pe? – Álbette, merekege mereke qosylyp jatyr. Bul kún «Qos toıyń qabat bolsyn, eki dúnıeń abat bolsyn» dep tilek qylǵan halqymyzdyń aq peıilin eske túsirdi. Bir jaǵynan, saılaý merekelik kóńil-kúımen ótip jatsa, ekinshi jaǵynan, Ulystyń uly kúni de toılanýda. Salt-dástúr ulyqtalyp, ulttyq oıyndar oınalyp jatyr. Án-jyr shyrqalýda. Onyń ústine, aýa raıy da jadyrap tur. Al sheteldik baıqaýshylar osynyń bárin kórip «Sizderde ár saılaý osylaı óte me?» dep tańdaı qaǵa tańǵalýda. – Saılaý kezinde qandaı da bir keleńsizdik nemese zań­buzýshylyq kezdesti me? – Oblys boıynsha saılaý ýchaskeleriniń kartasy jasaqtal­ǵan. Baqylaý shtabynyń músheleri ýchaskelerdi tańerteńnen bas­tap tynbaı aralady. Buǵan qosa, bizdiń shtabqa qarasty barlyq baqylaýshymen Whatsap jelisi arqyly onlaın baılanys­ta boldyq. Olar bizge saılaý ýchas­kelerindegi ahýaldy sát saıyn habarlap turdy. Týyndaǵan másele nemese suraq bolsa, sýret arqyly nemese mátin arqyly joldaıdy. Jalpy, saılaý aıqaı-shýsyz ótti, zańbuzýshylyq jáne ersi qylyq baıqalǵan joq. – Rahmet. Áńgimelesken Erjan BAITILES, «Egemen Qazaqstan». Qyzylorda oblysy.