PETROPAVL. 28 naýryz. «Astana arlandary» kásipqoı boks klýby Búkilálemdik boks serııasynyń altynshy maýsymdaǵy kezekti jekpe-jegin Petropavl qalasynda ótkizip, muhıt asyp kelgen Puerto-Rico Hurricanes komandasymen qolǵap túıistirdi. Bul týraly oblystyq dene shynyqtyrý jáne sport basqarmasyna silteme jasaǵan egemen.kz tilshisi habarlady.
BAQ ókilderine bergen suhbatynda komandanyń bas dırektory, London Olımpıadasynyń chempıony, barker kýbogynyń ıegeri Serik Sápıev maýsymaralyq úziliste komanda quramyna ózgerister engenin jetkizdi. Bas bapkerliktiń tizgini Respýblıkanyń eńbek sińirgen jattyqtyrýshysy Nurlan Aqúrpekovke senip tapsyrylǵan. Osynda el namysyn abyroımen qorǵap júrgen ulttyq komandanyń kóshbasshy boksshylary Rıo-de Janeıroda kútip turǵan Olımpıadaǵa tas-túıin daıyndyqqa qyzý kiriskendikten, jańa quramaǵa 30 boksshy qabyldanyp, bolashaǵynan mol úmit kúttiretin jastarmen tolyqqan. 2010 jyly alǵash ret tusaýy kesilgen jobaǵa bıyl birqatar túzetýler jasalypty. Atap aıtqanda, Búkilálemdik boks serııasy aıasynda jarysqa qatysýǵa nıet bildirgen 16 komanda tórt topta kúsh synasady. Ereje boıynsha ár toptan sýyrylyp shyqqan eki komanda jarystyń shırek fınalyna qosylady. Toptyq básekeniń jekpe-jekteri aınalmaly júıemen ótedi. Qazaqstan, О́zbekstan, Ázerbaıjan jáne Pýerto-Rıka komandalary «D» tobynda judyryqtasady.
Baıraqty básekeniń ashylý saltanatynda aımaq basshysy Erik Sultanov sóz sóılep, qadirli meımandar men jınalǵandardy aıtýly sport merekesiniń bastalýymen quttyqtady. Jerlesterimizge jarqyn jeńis tiledi.
Atalǵan boks serııasynyń eki márte jeńimpazy astanalyqtardyń sheshýshi aıqasqa tyńǵylyqty ázirlikpen kelgeni birden baıqaldy. Olaı deıtinimiz, 23 qańtarda shymyldyǵy ashylǵan baıraqty básekeniń alǵashqy oıynynda kúshti komandalardyń biri Ázerbaıjannyń «Baký ottaryn» tize búktirgenmen, dodada birinshi ret óner kórsetken ózbek quramasyna ese jiberip alǵan bolatyn. Osy joly jeńiske jetse, pleı-off týrnırine joldama almaq.
Sharshy alańǵa birinshi bolyp 49 salmaq dárejesi boıynsha Mardan Berikbaev pen Djon Ortıs kóterildi. Qarsylasynan boıy da, qoly da uzyndaý qazaqstandyq osy artyqshylyǵyn paıdalanyp, 3:0 esebimen jeńiske jetti. Edgardo Oskar Rolon Varelamen (56 kg.) qolǵap túıistirgen Nursultan Kósheǵulov aıqyn basymdyq tanytty. Iаnkarlos Rıveranyń (64 kg.) kelmeýi sebepti komanda kapıtany Samat Báshenovtyń enshisine bir upaı buıyrdy. Ábilhan Amanqul (75 kg.) Raýl Sanches Marteniń osal tusyn tapty. Erkin Muhamedjannyń (91 kg.) atan túıeni jalp etkizetindeı kúrzi soqqysy Ivan Hoel Rosado Torresty eki ret nokdaýnǵa túsirip, oıyn toqtatyldy.
Jalpy esep 5:0 bolyp, arlandyqtardyń paıdasyna sheshildi.
Kezekti jekpe-jek 2 sáýirde О́skemende О́zbekstannyń Uzbek Tigers komandasyna qarsy ótedi.
О́mir Esqalı.
Derek, foto: oblystyq dene shynyqtyrý jáne sport basqarmasy.