«National Geographic Qazaqstan» jýrnaly jaryq kórdi

Keshe Qazaqstan jáne AQSh ǵalymdarynyń qatysýymen Ulttyq mýzeıde jáne Nazarbaev Ýnıversıtette birqatar kezdesýler ótti. Atalǵan shara «National Geographic Qazaqstan» jýrnaly qazaqsha nusqasynyń jaryq kórýine oraı uıymdastyrylyp otyr.  Kezdesý qonaqtary – eki dúrkin Pýlıtser syılyǵynyń ıegeri Pol Salopek pen tanymal AQSh ǵalymy Aleksandr Moen. P.Salopek búkil álemdi jeti jyl boıy jaıaý sharlap ótýdi maqsat etip kele jatqan zertteýshi, jıhangez-jazýshy. Sol sapary aıasynda ol qazir Qazaqstanǵa kelip jetti. Al A.Moen «Out of Eden Walk», ıaǵnı «Edennen bastalǵan saıa­­hat» nemese «Álemdik serýen» jáne «Genography» jobalary­na jetekshilik etetin úlken ǵalym. Sonymen qosa, bul sharaǵa qazaqstandyq belgili antropolog, arheolog ǵalymdar, jazýshylar men fotograftar qatysty. «National Geographic Qazaq­stan» jýrnalynyń tuńǵysh ret qazaq tilinde jaryq kórýi, árıne, aıtýly mádenı oqıǵa. Soǵan oraı Ulttyq mýzeı dırektory Dar­han Myńbaı basylymnyń mańyz­dylyǵy týraly aıtyp ótti. – «National Geographic Qa­zaq­stan» jýrnaly qazaqsha nusqasynyń jaryq kórýine Elbasynyń ózi kóńil aý­daryp, joǵary baǵa bergen bola­tyn. Sondyqtan da, osy istiń ba­sy-qasynda júrgen azamattarǵa al­ǵys bildirgim keledi. Álem bo­ıyn­sha 700 mıllıon aýdıtorııasy bar bul basylym bizdiń elimizdi jahanǵa tanytyp qana qoımaı, týrısterdiń qyzyǵýshylyǵyn da oıatady dep oılaımyn. Sol sebepti de, biz ekijaqty áriptestik ornatyp, árqashan qoldaý kórsetýge daıynbyz, – dedi D.Myńbaı. Sondaı-aq, «National Geo­graphic Qazaqstan» qoǵamdyq zert­teý baǵdarlamalary vıse-prezı­denti Aleksandr Moen Ult­tyq mýzeıden alǵan áseri­men bólisip, kórsetken qol­daý­larǵa alǵys aıta kele, «National Geo­graphic Qazaqstan» jýr­naly­nyń atqa­ryp kele jatqan bas­ty mıssııasyna toqtalyp ótti. – Qazaqstan Respýblıkasy Ulttyq mýzeıine arnaıy ekskýr­sııanyń nátıjesinde Qazaq eli­niń tereń tarıhymen, baı máde­nıetimen keńinen tanysyp, erekshe áser alyp shyqtyq. «Natio­nal Geographic Qazaqstan» jýrna­lynyń basty mindeti jazý­shy­lardyń, ǵalymdardyń jumys­taryn jarııalaý arqyly qorshaǵan ortany taný jáne ony qorǵaý bolyp tabylady. Qazaqstan taraby bizben birigip, áriptestik ornatyp jatqanyna qýanyshtymyz. Or­talyq Azııada áli de bolsa aı­tyl­maı jatqan dúnıeler je­ter­lik. Aldaǵy ýaqytta osy ju­mystardy atqarý úshin úlken maq­sat­tar qoıyp otyrmyz, – dedi A.Moen. Belgili jıhankez Pol Salopek bolsa, Ulttyq mýzeıdegi adamzat tarıhynyń qundy jádigeri bo­lyp tabylatyn sırek ekspo­nat­tardyń saqtalý, nasıhattalý jumystaryna joǵary baǵa berdi. «Álemdik serýen» jobasyna keńinen toqtala kele: – Ulttyq mýzeıdiń zaldaryn aralap, aıryqsha áser aldyq. Memleket barlyq jaǵdaıdy jasap otyr eken. Bul quptarlyq saıasat dep oılaımyn. Men qazirgi ýaqytta «Álemdik serýen» jobasy aıasynda júz myń jyl buryn ata-babalarymnyń tabany tıgen joldarmen júrip kelemin. Saıahatymdy 2013 jyly qańtar aıynda Efıopııa elinen bastadym. Osy jolda kezdesken adamdardan estip-bilgen áńgimelerdi jazyp, keıin onyń bárin ǵylymı eńbek úshin paıdalanamyn, – dedi. Sonymen qatar, jıyn barysynda tuńǵysh ret qazaq tilinde jaryq kórip jatqan «National Geographic Qazaqstan» jýrnaly men bedeldi basylym qozǵaıtyn geografııa, arheologııa, antropologııa salalaryndaǵy sońǵy jańalyqtar sóz etildi. Raýshan TÁÝIRHANQYZY, «Egemen Qazaqstan».