Nursulý Tapalova atyndaǵy respýblıkalyq bı baıqaýy kópshilikti súıindirdi
Oblys ortalyǵyndaǵy Qazaqstan halqy Assambleıasy ǵımaratynda Táýelsizdiktiń 25 jyldyǵyna jáne oblystyq halyq shyǵarmashylyǵy úıiniń 55 jyldyǵyna arnalǵan Nursulý Tapalova atyndaǵy III respýblıkalyq «Bıdiń nury – Nursulý» atty jeke oryndaýshylar bı baıqaýy ótkizildi.
Bul baıqaýǵa kásibı jáne áýesqoı bı ujymdarynyń 15-25 jas aralyǵyndaǵy jeke oryndaýshylary qatysty.
Baıqaý eki týrdan turdy. Birinshi týrda bı dodasyna qatysýshylar halyqtyq bı mektebi boıynsha óner kórsetti. Al, ekinshi týrda bıshiler óz tańdaǵan bılerin bıledi.
Baıqaý shymyldyǵy Máskeý qalasynda ótken halyqaralyq bı baıqaýynyń Gran-prı jeńimpazy «Mega Star» sán jáne bı stýdııasy bıshileriniń bıimen ashyldy. Sodan keıin qazaqtyń tuńǵysh balerınasy Nursulý Tapalova týraly beınefılm kórsetildi. Týma talanttyń qazaqtyń balet bı ónerinde jarqyraı janǵan juldyzdy sátteri jańǵyrtylyp, keıingi tolqyn jastarǵa ónege retinde usynyldy. Onyń kezinde akademık Ahmet Jubanovtyń kózine túsip, kúmis kómeı ánshi Kúlásh Baıseıitova, myń buralǵan býynsyz bıshi Shara Jıenqulova jáne basqa ulttyq ónerimizdiń irgetasyn qalaǵan uly tulǵalarmen birge qazaq óneri men mádenıetiniń bastaýlarynda turyp, ulttyq ónerdiń qalyptasýyna bir kisideı eńbek sińirgeni belgili. Álemge áıgili balet bıshisi Galına Ýlanovamen birge bıledi degen de derek bar. Ol «Jambyl», «Belye rozy» fılmderine túsken. Al, qazaq baletiniń damýyna qosqan úlesi ushan-teńiz deý oryndy. Biz muny ataqty bıshi Bolat Aıýhanovtyń esteligine súıenip aıtyp otyrmyz, árıne.
Baıqaýǵa qatysýshylar ónerin elimizdegi horeografııa salasynyń jetekshi mamandary baǵalady.
Astanalyq bıshi Ashat Máden baıqaýdyń Gran-prı júldesin jeńip aldy. Birinshi oryndy da astanalyq Saǵynysh Nurhaıdarova ıelendi. Ekinshi oryn Ońtústik Qazaqstan oblysynyń bıshisi Marjan Sársenbekke buıyrdy. Úshinshi oryndy Mańǵystaý oblysynan kelgen bıshi Anar Qydyrbaeva men aqtóbelik Kámshat Bımaǵanbetova bólisti.
Baıqaý jeńimpazdary men júldegerleri dıplomdarmen jáne aqshalaı syılyqtarmen marapattaldy. Baıqaýǵa qatysqan bıshilerdiń barlyǵyna bı óneri saıysyn uıymdastyrýshylar atynan syı-sııapat jasaldy.
Satybaldy SÁÝIRBAI,
«Egemen Qazaqstan».
Aqtóbe oblysy.