QARAǴANDY. 7 sáýir. Qaraǵandy qalasynda polısııa qyzmetkerleri bir táýlik ishinde egde jastaǵy áıelderdi tonaýmen aınalysqan alty adamdy qolǵa túsirdi. Bul týraly Qaraǵandy oblystyq ishki ister departamentiniń baspasóz qyzmetine silteme jasaǵan egemen.kz tilshisi habarlady.
Eń aldymen 64 jastaǵy keıýanany tonap, 12 myń teńgesi men uıaly telefonyn alyp ketken úsh kúdikti ustaldy. Olar ózderiniń kinálaryn tolyqtaı moıyndady. Sol kúni úsh adamnan quralǵan top 73 jastaǵy zeınetkerge shabýyl jasaǵan. Olar zardap shegýshini basynan uryp qulatqan da jeke zattaryn alyp ketken.
Kúdiktilerdiń barlyǵyn da tártip saqshylary arnaıy ornatylǵan beıne baqylaý kameralary arqyly ustady. Qazirgi tańda qamaýǵa alynyp, osy eki oqıǵa boıynsha sotqa deıingi tergeý amaldary júrgizilýde.
Qaırat Ábildınov.
Derek: Qaraǵandy oblystyq ishki ister departamentiniń baspasóz qyzmeti.
Foto: mega-u.ru.