Keshe Astanada Qazaqstan halqy Assambleıasy Tóraǵasynyń orynbasary – Hatshylyq meńgerýshisi Eraly Toǵjanov Prezıdent janyndaǵy Ulttyq jańǵyrtý komıssııasy jumys tobynyń sarapshylarymen kezdesti.
Prezıdenttik reformalardy talqylaýǵa arnalǵan bul basqosýda elimizde josparlanǵan reformalar týraly aqparattarmen qamtamasyz etý, sondaı-aq, sarapshylarmen keri baılanys tetigin qalyptastyrý máseleleri keńinen sóz boldy.
Jıynda Eraly Toǵjanov bes ınstıtýttyq reformanyń tórtinshi – «Bolashaǵy birtutas ult» reformasyn júzege asyrýǵa erekshe kóńil bólinip otyrǵanyna toqtaldy. Osy oraıda E.Toǵjanov: «Qoǵamdyq kelisim jáne ulttyq birlik salasyndaǵy memlekettik saıasatty kún tártibindegi ózekti máseleler boıynsha ǵylymı usynystarmen jáne ázirlenimdermen qamtamasyz etý qajet», – dedi.
Odan ári Qazaqstan halqy Assambleıasy Tóraǵasynyń orynbasary qoǵamymyzda qolǵa alynýy tıis naqty sharalar jóninde aıtyp berdi.
«О́zderińizge belgili, Qazaqstan halqy Assambleıasynyń janynan Ǵylymı-saraptamalyq keńes qurylǵan bolatyn. Onyń jumys istep jatqanyna 5 jyldan astam ýaqyt ótti. Sonymen qatar, elimizdiń árbir oblysyndaǵy joǵary oqý oryndarynda Qazaqstan halqy Assambleıasynyń kafedrasyn ashtyq. Mundaǵy maqsatymyz – joǵary oqý oryndarynda bilim alyp jatqan jastarǵa elimizdiń birlik jónindegi saıasatyn túsindirý.
Qoǵamdyq kelisim men ultaralyq tatýlyqtyń qazaqstandyq modelin eń aldymen jastarymyz bilýi qajet. Sonymen qatar, kópultty Qazaqstannyń qalyptasý tarıhyn da búgingi jastarymyz, halqymyz bilgeni jón. Bul baǵytta atqarylyp jatqan jumystardy jurtymyz uǵyp júrýi tıis», – dedi ol.
Onyń aıtýynsha, memlekettik qyzmette jumys isteıtin barlyq azamat qoǵamdyq kelisim men ulttyq birlik máselesine oraı arnaıy daıyndyqtan ótkeni durys. Ol úshin Prezıdent janyndaǵy Memlekettik qyzmet akademııasynda arnaıy ortalyq qurylǵan. Atalǵan ortalyqtan 3 jyldyń ishinde 2700-ge jýyq azamat dáris alǵan.
Aıta keteıik, kezdesýge belgili sarapshylar, saıasattaný salasyndaǵy belgili mamandar, Prezıdent janyndaǵy Basqarý akademııasynyń, Eýrazııalyq ıntegrasııa ınstıtýtynyń jáne «Qoǵamdyq pikir» zertteý ınstıtýtynyń ókilderi qatysty.
Joldybaı BAZAR,
«Egemen Qazaqstan»