sheber EKSPO-2017 kórmesine shaqyrtý aldy
Qyzylorda qalasynyń turǵyny Názıpa Sarymsaqova – plastıkalyq qutylardan gúl jasaıtyn sheber. Ol bul kásippen eki jyldan beri aınalysyp keledi. Alǵashynda 5 lıtrlik qutylardy tastamaı, olardan túrli oıynshyqtar jasaýǵa beıimdele bastapty. Sodan keıin esik aldynda ósetin gúlderge kerekti qorshaýlardy da ózi qurastyrǵan. Keıin ǵalamtor arqyly gúldiń túrli nusqalaryn kórip, solardy plastıkalyq bótelkeden jasaýdy qolǵa alǵan. Qazirgi tańda sheberdiń qolynan shyqqan 100-ge jýyq gúl kompozısııasy bar.
– Bir gúldi jasap shyǵý úshin birneshe kún eńbek etemin. Oǵan qajetti plastmassa qutylardy jınap biraz ýaqyt joǵaltamyn. Kóbine qoǵamdyq tamaqtandyrý oryndarynan alamyn, – deıdi ol.
Názıpa apanyń úıine kelgen adam quddy bir baqqa kirgendeı áserge bólenedi. Mundaǵy raýshan, lılııa, qyzǵaldaq, túımedaq sııaqty jasandy gúlder tiri ósimdikterden aınymaıdy.
Qazir sheberge tapsyrys berýshiler óte kóp. Gúlderiniń baǵasy da ártúrli. Olar 200 teńgeden 10 000 teńgege deıin barady. Ol qazir kezekti gúlder serııasyn jasaý jolynda qyzý eńbek etýde. Sebebi, EKSPO-2017 kórmesine qatysý úshin arnaıy shaqyrtý alǵan.
Talǵat RAIYMBEK,
«Egemen Qazaqstan»