Neıton LOÝLER, fızıka-matematıka baǵytyndaǵy Nazarbaev zııatkerlik mektebi dırektorynyń orynbasary:
Men ózim Amerıka Qurama Shtattarynda týyp-óstim. Joǵary oqý ornyn támamdaǵan soń osynda keldim. Qazir oblys ortalyǵyndaǵy fızıka-matematıka baǵytyndaǵy Nazarbaev zııatkerlik mektebinde jumys isteımin. Men qazaqstandyqtardyń yntymaǵy men birligine dán rızamyn. Munyń barlyǵy Prezıdent N.Nazarbaevtyń sarabdal saıasatynyń arqasy ekenine kóz jetkizip kelemin. Qazaqstannyń ıadrolyq qarýdan bas tartyp, egemendiktiń eleń-alańynda Semeı ıadrolyq synaq alańyn jabýy dúnıejúzi elderine ónege bolǵany aıdaı aqıqat.
Qazaqstan basshysy táýelsizdik alǵan jyldary halqynyń qaýipsizdigin birinshi kezekke qoıdy, aldymen ıadrolyq qarýdan bas tartty, sodan soń memlekettiń shekarasyn zańdastyrdy. Qazaqstannyń bul saıasaty búginde alpaýyt memleketter úshin úlken úlgi boldy deý oryndy. N.Nazarbaevtyń «Álem. HHI ǵasyr» atty manıfesi de dúnıejúzindegi barsha halyqtyń bakytyna baǵyttalǵan bastama ekenin aıtýǵa tıispiz.
Nursultan Ábishulynyń álem jurtshylyǵy aldynda aıtqan aqıqatty oılary kim-kimdi de beıjaı qaldyrmasy anyq. Mundaı órkenıetti bastamaǵa barsha memleket basshylary qoldaý kórsetýi kerek. Keleshegin oılaǵan qaı halyq ta osy manıfesten sabaq alýy tıis.
Qazaqstan – men kórgen jerdegi jeruıyq meken, tatýlyq tuǵyry berik el. Men osyndaı elge tap kelgenime ylǵı da rızashylyǵymdy bildirip júremin. Qonaqjaı Qazaq elinen adamzattyń asqaq armany – beıbitshiliktiń baıandy bastamalary tamyr tartýy da sondyqtan dep oılaımyn. Udaıy barsha adamzatty beıbit qatar ómir súrýge shaqyryp, sol jolda bastamashy bolyp kele jatqan elde turyp, eńbek etip jatqanyma rızamyn. Bul eldiń erteńi jarqyn, bolashaǵy baqytty bolaryna senimim mol. Men sondyqtan da qazaq tilin oqyp-úırenip, salt-dástúrlerin ıgerýge qulshynys tanytyp kelemin.
Qazaqstan Respýblıkasynyń Prezıdenti Nursultan Nazarbaevtyń manıfesi arqyly taǵy da Qazaq eliniń beıbit bastamasy álemdik deńgeıde aıtylǵan adamzattyń asyl ańsary retinde asqaq estilýde. Jappaı qyryp-joıatyn qarýmen másele sheshýge talpyný ulttyq ózimshildik, memlekettik menmenshildik der edim.
Qazir álem tynyshsyz bola bastady. Jer-jerde lańkestik oqıǵalar oryn alýda, álemdik soǵys órtiniń tutanyp ketý qaýpi baıqalady. Bul árkimdi, sonyń ishinde, búkil bir eldiń tizginin ustaǵan, halyqtyń jaýapkershiligin moınyna alǵan memleket basshylarynyń qaperinde bolýy kerektigin Qazaqstan Prezıdenti N.Nazarbaev taǵy bir eske saldy. Nursultan Ábishulynyń ıadrolyq qarýdan bas tartý, ony beıbit maqsatqa paıdalaný týraly oılary asa ómirsheń. Bul – barlyq halyqtardyń kóńilinen shyǵatyn, kókiregine qonatyn bastama.
Kúlli álem jurtshylyǵy buryn-sońdy qulaq estip, kóz kórmegen sumdyq oqıǵalardyń kýási bolýda. Eýropaǵa tolassyz aǵylǵan bosqyndar legi, Sırııadaǵy júzdegen myń adam qurbandyǵyna soqtyrǵan surapyl soǵys, Túrkııada, Belgııada, Pákistan men basqa da memleketterde bolyp jatqan lańkestik áreketter, Ázerbaıjan men Armenııa arasynda qaıta órshigen qaqtyǵys árkimdi oılandyrýy tıis dep oılaımyn.
Men ózim eki eldiń ortasynda altyn kópir bolyp, qazaq balalaryna aǵylshyn tilin úıretip júrgenimdi maqtan etemin. Qazir oblysta ótetin qoǵamdyq-saıası, mádenı sharalaraǵa belsene qatysamyn. Sol arqyly beıbitshilik pen tatýlyqtyń baǵasyn jas urpaqtyń sanasyna sińirýge tyrysamyn. Shákirtterim de meni jaqsy túsinedi. Qazaqstanda baqytty ómir súrýdiń barlyq múmkindikteri qarastyrylǵan. Eń bastysy – beıbitshilik pen tatýlyqqa negizdelgen eldegi saıasattyń barsha qazaqstandyqtardy bolashaqtaryna zor senimmen qaraýǵa sendiretini qýantady.
Dostyq pen birlik bar jerde baqýatty turmys, baqytty ómir bolatynyna senim mol. Prezıdent N.Nazarbaevtyń «Álem. HHI ǵasyr» atty manıfesin qarýsyzdanýdyń qazaqstandyq ustanymynyń aıshyqty kórinisi dep baǵalaý jón der edim. Jalpy, ıadrolyq qarýdyń qanshalyqty qaıǵy-qasiret ákeletinin álem jurtshylyǵy túsinip boldy. Mundaı qarýly qaqtyǵystardyń aldyn alý – adamzattyń ortaq problemasy. Sondyqtan Prezıdent N.Nazarbaevtyń manıfesine álem qulaq túrýi kerek, osy baǵytta kúsh biriktirýi qajet dep oılaımyn.
Aqtóbe oblysy