Adam balasy úshin qaıda ómir súrý mańyzdy emes, mańyzdysy – tynysh zaman, bala-shaǵańnyń arasynda, olardyń kúmis kúlkisine oranyp shat ómir súrý, ýaıymsyz eńbek etý. Biz taǵdyrdyń jazýymen keń-baıtaq qazaq jerinde, alyp josparlardy aldyna qoıǵan Qazaqstan memleketinde ómir súrýdemiz.
Qazaq dalasynda adam balasynyń ýaıymsyz, qaýipsiz ómir súrýi úshin qajetti jaǵdaılardyń barlyǵy jasalynǵan – eresekter qyzmette, ýaqytynda jalaqysyn alyp turady, balalar sabaǵyn oqyp, tıisti tálim-tárbıesin alýda, qarttarymyz zeınet ómiriniń qýanyshyn bastan ótkerýde. Osy jarasymdy tirliktiń keıingi urpaqtarymyzǵa jalǵasýyna barynsha tilekshimiz.
Álem elderindegi ártúrli ahýaldardan habardar bola otyryp, olardyń qaıǵysyna qınala qaraımyz. Jyly úıin, ornyqty turmysyn tastap, aıaq astynan bosqynǵa aınalǵan mıllıondaǵan adamdardyń, ash-jalańash, aýrý meńdegen balalardyń ómiri kez kelgen jandy beıjaı qaldyra almaıdy dep oılaımyn.
Bizdiń elimiz – táýelsiz Qazaqstan beıbitshiliktiń uıasy, yntymaqtyń ordasy. Munda sandaǵan ulttyń ókilderi tatý-tátti ǵumyr keshýde. Qazaqtyń kıiz úıine qadalǵan ýyqtar tárizdi barlyǵymyz bilek pen tilek biriktirip, bir ortaq shańyraqty kókke kóterip kelemiz. Elbasymyz Nursultan Nazarbaevtyń ultaralyq tatýlyqtyń tamyryn tereńge jiberý, ymyrashyldyq pen baýyrlastyq ıdeıasy jarasym tapqan elimizdiń saıasatyna, baǵytyna qazir álem elderi qyzyǵýshylyq tanytyp otyr. Prezıdentimiz ıadrolyq qarýdy aýyzdyqtaý, jer betinde soǵysty boldyrmaý ıdeıasyn usynyp, túrli keleńsizdikterdiń aldyn alýǵa qatysty alyp baǵdarlama jasaqtaý qajet ekendigin álem elderiniń nazaryna berdi. Bul da – qazaqstandyq beıbitshilik súıgish ustanymnyń naqty nátıjesi, kórinisi.
Beıbit elimizdiń berekesi artyp, irgesi nyǵaıa túsýi úshin, balalarymyz baqytty ómir súrýi úshin eńbek etip kelemiz. Bolashaǵymyz berik, baqýatty bolsyn degen tilek – barsha qazaqstandyqtardyń ortaq tilegi dep bilemin. Ol úshin keń dalany meken etýshi ulttar ózara uıysa túsýi qajet.
Aırapet KÝRDOGLIаN,
«Ehpaırýtıýn» armıan etnomádenı birlestiginiń tóraǵasy
AQTAÝ