Qart Qarataýdyń etegindegi Kentaý qalasynda halqymyzdyń san ǵasyrlyq tarıhynyń kózi tiri kýágeri – Qarnaq degen aýyl bar. Búkil túrki áleminiń rýhanı ortalyǵy Qoja Ahmet Iаsaýı kesenesindegi ataqty taıqazandy ustalar osy Qarnaqta quıǵan. Álemdegi eń alyp, qasıetti qazannyń patshalyq Reseı kezinde oljalanyp, Peterbýrgtegi Ermıtajda bertinge deıin turǵandyǵy belgili. Mine, osyndaı tarıhy bar aýylda «Iаssy-nesıe» seriktestigi sharýalarmen tabysty jumys isteýde.
Jaqynda «Agrarlyq nesıe korporasııasy» AQ-tyń uıytqy bolýymen jýrnalıster respýblıkada úzdikter qatarynan kóringen «Iаssy-nesıe» seriktestiginiń jumysymen tanysyp qaıtty.
Jalpy, bul óńirdiń sharýalary eńbekqorlyǵymen erekshelenedi. «Iаssy-nesıe» seriktestigimen jumys istep kele jatqan sharýanyń biri Ýálıhan Asaev mundaǵy qarjylandyrýdyń óte tıimdi ekendigin aıtady.
Ýálıhan Asaev tórt jyldan beri jylyjaı salýmen aınalysyp, tabysyn eselep keledi. Qazir ol 0,2 gektar jerge qııar, qyzanaq ekken. Dıqandar búginderi qolyna túsken uryqty ege bermeıdi. Munda qyzanaqtyń «Býran» túri, al qııardyń «Spaın» túri ósiriledi. Ýálıhan Asaev jylyna 16-17 tonna ónim alady. Qara bazarda qyzanaqtyń kılosy 850 teńgeden tómendemeı turǵanyn esepke alatyn bolsańyz dıqannyń mańdaı teriniń ótelgenin shamalaı berersiz. Árıne, qıyndyq joq emes. Jylyjaılarǵa jyl saıyn berilip kelgen sýbsıdııanyń kólemi shekteldi.
Úkimet qaıtarymsyz mol qarjy beredi eken dep otyrý erteńgi kúnin oılaǵan adamdy masyldyq pıǵyldan qutqarady. О́zara básekelestik jaǵdaıda jumysyn durys jolǵa qoıyp, artyq shyǵynsyz eńbek etetinderdiń utysqa shyǵar jeri osy. Osynyń bárin oı eleginen ótkizgen sharýalar «Iаssy-nesıe» seriktestiginen tıimdi baǵada qarjy alyp, jumystaryn jylǵa qoıyp jatyr. Máselen, Ý.Asaev bes jylǵa tómen paıyzben nesıe alyp, jylyjaıynyń jylý júıesin jańartty. Mal sharýashylyǵy salasynda da jaqsy tabysqa jetip keledi. Qazir onyń sharýa qojalyǵynda 200 bas iri qara jáne qazaqy edilbaı tuqymdy myńǵa tarta qoı bar.
Búginde «Iаssy-nesıe» seriktestigi jeti júzden astam sharýa qojalyǵy men dıqandardy qarjylandyryp keledi. Nesıe seriktestigi bes júz myń teńgeden otyz mln. aralyǵynda nesıe bere alady. Seriktestik basshylyǵy memleket tarapynan sýbsıdııalaý kútip otyrǵandyǵyn, ondaı jaǵdaıda nesıeniń jartysyn Úkimet kóterip alatyndyǵyn aıtady.
Aýyl sharýashylyǵy – kúrdeli sala. Keı jyldary qýańshylyq bolsa jaıylymdyq jer tabylmaı, talaı fermerlerdiń taıaq ustap qalatyndaı jaǵdaıy bolǵan. Kóktem erte shyǵyp, sońy úskirikke ulassa, jemis aǵashtary da boıyndaǵy nárinen aıyrylady.
Onyń ústine jemshóp, túrli tyńaıtqyshtar men tehnıkaǵa qarjy shyǵarýdyń qıyn-túıin tustary bar. Osyndaı jaǵdaıda aýyl sharýashylyǵyna memlekettik kómek búkil dúnıejúzinde kórsetiledi.
«Agrarlyq nesıe korporasııasy» AQ-tyń arqasynda 2001-2015 jyldary aralyǵynda 163 aýdan men 13 oblys kóleminde 171 nesıelik seriktestik ashylǵan. Búgingi kúnderi osy júıe boıynsha 12 myńnan astam aýylsharýashylyq taýar óndirýshileri jumystaryn jolǵa qoıdy.
Elimizdiń azyq-túlik qaýipsizdigin qamtamasyz etý baǵytynda nesıe seriktestikteriniń jumysyn jolǵa qoıǵan «Agrarlyq nesıe korporasııasy» AQ «Sybaǵa», «Qulan» jáne «Altyn asyq» memlekettik baǵdarlamalary boıynsha da nesıe alamyn deýshilerge kómektesip keledi.
Baqtııar TAIJAN,
«Egemen Qazaqstan»
Ońtústik Qazaqstan oblysy