ASTANA. 22 sáýir. Qazaqstan Prezıdenti Nursultan Nazarbaev Shymkent qalasyndaǵy «Hımfarm» aksıonerlik qoǵamynyń jańa sehynda boldy. Bul týraly akorda.kz-ke silteme jasaǵan egemen.kz tilshisi habarlady.
Qazaqstan Prezıdenti kásiporynnyń jańa sehynyń jumysymen jáne óndiretin ónimderimen tanysty. Sondaı-aq, Memleket basshysy eńbek ujymy ókilderimen áńgimelesip, sehtyń ashylýymen quttyqtady jáne onyń tabysty damýyna, básekege qabilettiliginiń joǵary bolýyna tilektestigin bildirdi. Nursultan Nazarbaev búginde dárilik preparattar naryǵy perspektıvaly baǵyttardyń biri bolyp otyrǵanyn, sondyqtan otandyq farmasevtıka salasynyń kóshbasshysy retinde kásiporyn men qala úshin zor múmkindikterge jol ashylatynyn aıtty.
Seh eńbekkerleri Qazaqstan Prezıdentine osy salaǵa kóńil bólip otyrǵany úshin alǵys aıtty.
Aıta keteıik, «Hımfarm» aksıonerlik qoǵamynyń jobasy jalpy quny 14 mıllıard teńge bolatyn 4 kezeńnen turady. Búginde quny 5,8 mıllıard teńge bolatyn birinshi kezeńi júzege asyrylǵan. Joba 350 mıllıon ampýla ıneksııalyq eritindi, 4 mıllıon paket ınfýzıondy eritindi, 40 mıllıon flakon antıbıotık jáne 1 mıllıard tabletka shyǵarýǵa múmkindik beredi.
Kásiporyn eldiń jalpy dári-dármek naryǵynyń 5 paıyzdan astamyn qamtıdy jáne dárilik zattardyń ishki óndirisiniń 50 paıyzdan astamyn qamtamasyz etedi.
Talǵat Raıymbek.
Derek: akorda.kz.
Foto: inform.kz.