Ortalyq kommýnıkasııalar qyzmetinde ótkizilgen kezekti brıfıngte eldegi sybaılas jemqorlyqpen kúresý máselesi áńgimeniń negizgi ózegine aınalyp, Memlekettik qyzmet isteri mınıstrliginiń Sybaılas jemqorlyqqa qarsy saıasat departamentiniń dırektory Ədı Ǵalymjan men Sybaılas jemqorlyqqa qarsy is-qımyl ulttyq bıýrosynyń departament basshysy Esqalı Salamatov jýrnalıstermen osy jumystaǵy nátıjelermen jáne aldaǵy mindettermen bólisti.
Brıfıng moderatory birinshi sózge tartqan Sybaılas jemqorlyqqa qarsy saıasat departamentiniń dırektory Ədı Ǵalymjan: «Sońǵy jyldary sybaılas jemqorlyqqa qarsy saıasatta elde eleýli jańalyqtar bolyp jatyr. Atap aıtqanda, basymdyq onyń aldyn alý sharalaryna berilip, jemqorlyqty aýyzdyqtaý úshin memleket pen qoǵamnyń kúshi biriktirilýde. Mundaǵy eń mańyzdy kezeń osy jyldyń basynan «100 naqty qadamnyń» 13-qadamyna sáıkes jańa zańnyń qabyldanýy boldy. Ol kásibı memlekettik qyzmetti, kásibı memlekettik apparatty qurýdaǵy el aldyndaǵy mindettiń biri» dep ol ári qaraıǵy oıynda sybaılastyqpen, jemqorlyqpen kúreste qandaı jumystar atqarylyp jatqanymen bólisti.
Onyń aıtýynsha, qazirgi kúni arnaıy monıtorıngpen qatar, sybaılastyq táýekelin saraptaý, sybaılastyqqa ymyralyq tanytpaý mádenıeti syndy birneshe tetikter qaptaldasa júrip, qoǵamnyń alǵa jyljýynda aıaqqa tusaý bolatyn keselmen kúres tııanaqty ótkizilmek. Sonymen qatar, tuńǵysh ret sybaılastyqpen kúres jaıynda Ulttyq baıandama jasalatynyn jetkizgen ol jýrnalıster qoıǵan saýaldarǵa jaýap berý kezinde bizdiń elimizdiń transparensııa reıtıngisiniń sońǵy esebi boıynsha 123-orynda ekenin aıtty. О́tken jyly 126-orynda edik, bıyl 3 orynǵa joǵarylap otyrmyz», – degen departament dırektory jýrnalıstiń jemqorlyqqa qarsy jazaǵa tartýda Qytaı men Sıngapýr tájirıbesin engizgen durys emes pe degen saýalyna da jaýap berdi.
«Bizdiń oıymyzsha, aýyr jaza jemqorlardy azaıtpaıdy. Sebebi, bir adam ketkenimen, ornyn basqa, adam almastyrady. Sondyqtan biz qolǵa alyp jatqan jumys osy məselelerdiń aldyn alýǵa baǵyttalǵan. Adam qandaı jolmen sybaılas jemqorlyqqa barady? Keıbir memlekettik qyzmetshiler qujat berý kezinde zańdy buzady. Sebebi, naqty standart, reglament joq. Sony keıbir memlekettik qyzmetishiler paıdasyna jaratyp, qaltasyn qalyńdatady. Endi biz sondaı qyzmetterdi qalaı kórsetý jáne qansha ýaqytta qujat daıyn bolý kerek degen tártipti anyqtap, kerekti qujattar tizimin de aıqyndap, barlyǵyn bir izge túsirip reglamenttedik. Azamattardyń óz quqyǵyn bilmeýi, talap ete almaýy sybaılastyqqa jol ashady. Respýblıka boıynsha, barlyq ákimdikter men ózge memlekettik organdar úshin azamat ótinishin, talabyn oryndaýda birizdilik sybaılastyqtyń tamyryn qııady.
Biz, árıne, álemdik tájirıbelerdi eskeremiz, alaıda, qylmyspen ol ábden oryn alǵannan keıin emes, qaıta onyń aldyn alǵan tıimdi degen tájirıbelerdi eskerdik. Aldaǵy ýaqytta osy baǵytta jumystar atqarylady. Negizinde elimizdiń Qylmystyq kodeksinde bul qylmys aýyr qylmys túrinde qarastyrylyp, uzaq jylǵa bas bostandyǵynan aıyrylýmen birge, dúnıe-múlki tárkilenedi. Sondyqtan, qylmystyń bul túrine aýyr jaza qarastyrylǵan»,– dedi Ədı Ǵalymjan.
Brıfıngte sóz berilgen endigi sheshen Sybaılas jemqorlyqqa qarsy is-qımyl ulttyq bıýrosynyń departament basshysy Esqalı Salamatov: «Bıýro osy jyldyń basynda biryńǵaı sot aldyndaǵy reestrde 1097 qylmys tirkedi. Onyń 7-8 paıyzy – sybaılas jemqorlyqqa qatysty. Sybaılas jemqorlyq qylmysy boıynsha memleketke 3,6 mlrd. teńge zııan kelip, onyń 2 mlrd. teńgesi, ıaǵnı 56 paıyzy memleket qazynasyna qaıtaryldy, sybaılas jemqorlyqqa qatysy bar dep aıyptalǵan azamattardyń 2,4 mlrd. teńge bolatyn múlkine buǵaý salyndy», – dedi.
Brıfıngke shaqyrylǵan laýazymdy tulǵalar jýrnalıster tarapynan qoıylǵan ózge de saýaldarǵa jaýap berdi.
Anar TО́LEÝHANQYZY,
«Egemen Qazaqstan»