birqatar tártip buzýshylyqty anyqtady
Burnaǵy kúni respýblıkalyq Esep komıtetinde «Aqparatty Qazaqstan-2020» memlekettik baǵdarlamasynyń iske asyrylý barysyna oraı júrgizilgen memlekettik aýdıttiń qorytyndylary qaraldy. Jıynǵa Investısııalar jáne damý mınıstrliginiń Baılanys, aqparattandyrý jáne aqparat komıtetinen, sondaı-aq, birqatar vedomstvolyq mekemelerden basshylar qatysty.
– Memlekettik baǵdarlamanyń júzege asyrylý kezeńderinde Baılanys jáne aqparat komıtetine bólingen 145 mıllıon teńgege qatysty qarjy zańyn buzýshylyq oryn aldy. Qazir munyń 142 mıllıon teńgesi qazynaǵa qaıtaryldy. Sonymen qatar, memleket qarjysynan bólingen 41 mıllıard teńgeniń 14,6 mıllıardy tıimsiz paıdalanylǵan, – dedi Esep komıtetiniń múshesi A. Gorıaınov jıynda.
Komıtet múshesi óz sózinde aýdıttik tekserý aıasyndaǵy qorytyndymen ǵana shektelmedi. Ol, sondaı-aq, otandyq BAQ ókilderi sheteldik jýrnalıster sekildi oqıǵany halyqqa der kezinde jetkizý jaǵynan kem túsip jatatynyna jáne elimiz telearnalarynyń reıtıngileri túsip ketkenine toqtaldy.
Alaıda, «Habar» AQ basqarma tóraǵasy Aıdos Úkibaev bul pikirmen kelispeıtinin bildirdi.
– Múmkin biz reseılik BAQ-tan tanymdyq kontent jaǵynan qalyp kelermiz, alaıda, aqparattyq-ıdeologııalyq jaǵynan eshbir ese jibermeımiz. Muny saıası naýqandar nátıjesinen baıqaýǵa bolady, – dedi ol. Munan keıin Investısııalar jáne damý vıse-mınıstri Sáken Sársenov sóz alyp, elimizdegi aqparat quraldarynyń atqaryp kele jatqan jumystary jaıynda jan-jaqty baıandady. Al otyrysty qorytyndylaý barysynda Esep komıtet tóraǵasy Qozy-Kórpesh Jańbyrshın otandyq BAQ jetekshilerine ishki aýdıt jáne zań qyzmetiniń jumystaryn jandandyrýdy usyndy.
Talǵat RAIYMBEK,
«Egemen Qazaqstan»