Qoǵam jumyla eńbek etip, birlik pen yntymaqtyń arqasynda ózgeretindigi álimsaqtan aıan. Búgingi kúni elimizde kóptegen jastar uıymdary belsendi jumys atqaryp keledi.
Máselen, «Nur Otan» partııasynyń janynan qurylǵan «Jas Otan» jastar qanaty qoǵamdyq-saıası jumystardyń kóshbasshysy bolyp, jastardyń belsendiligin arttyrýǵa atsalysyp kele jatsa, «Jasyl El» eńbek jasaqtary tazalyq, kógaldandyrý jumystaryna járdem ete otyryp, tabıǵatty qorǵaýǵa úlken úles qosýda. Al Qazaqstan Stýdentter alıansy, Qazaqstan Jastar kongresi stýdent jastardyń áleýmettik-ekonomıkalyq, quqyqtyq jáne turmystyq máselelerin sheshýde jastardy qoldaý jónindegi jobalar ázirlep, olardyń júzege asýyna bastamashy bolyp otyr.
Endeshe, elimizdiń erteńine beı-jaı qaramaıtyn belsendi jastary Táýelsizdiktiń 25 jyldyq mereıtoıy men Almaty qalasynyń 1000 jyldyǵyna oraı «Bolashaǵy jarqyn Máńgilik Eldiń jastary» degen atpen respýblıkalyq patrıot jastar forýmynda bas qosty. Almaty qalasy jastar saıasaty basqarmasy men Qazaq memlekettik qyzdar pedagogıkalyq ýnıversıtetiniń uıymdastyrýymen ótken jastar forýmyna respýblıkanyń ár óńirinen 100-den astam jastar uıymdarynyń ókilderi men Jastar isi jónindegi komıtet tóraǵalary, #G38 uıymy, Almaty qalasy stýdentter alıansy, «Jasyl El» jastar eńbek jasaqtary, Qazaqstan halqy Assambleıasynyń «Jarasym» jastar kanaty, «Almaty eriktiler lıgasy», «Suńqar» stýdentter kásipodaǵy qatysty.
– Jas kelse – iske» deıdi halyq. Myńjyldyq tarıhy bar arý Almatynyń tórinde stýdentterdiń ózin ózi basqarý jumystaryn jetildirýge arnalǵan usynystaryn talqylaý úshin bas qosyp otyrǵandaryńyzǵa qýanyshtymyn! Elbasy óz Joldaýynda «Men jastar – bizdiń bolashaǵymyzdyń tiregi degendi árkez aıtyp kelemin. Memleket jańa býynnyń aldynda barlyq esikter men joldardy ashty! «Nurly Jol», mine, bizdiń kreatıvti yrǵaqty jastarymyzdyń kúsh-jiger jumsap, qulash sermeıtin tusy osy. Sizderdiń jalyndaǵan kúsh-qýattaryńyz ben alǵyr oılaryńyz tyń jańalyqty engizýge múmkindik beredi. Elbasy aıtqandaı, «Tereń bilim – táýelsizdigimizdiń tiregi, aqyl-oı – azattyǵymyzdyń aldaspany». Bilimderińiz sapaly, qabiletterińiz qarymdy, paıym-parasattaryńyz tereń bolsyn! Máńgilik Eldiń kóshin bastaıtyn da, túzeıtin de, damyǵan elderdiń deńgeıine jetkizetin de – sizdersizder! – dedi Qazaq memlekettik qyzdar pedagogıkalyq ýnıversıtetiniń rektory Dınar Nóketaeva forýmnyń ashylýynda.
Almaty qalasy jastar saıasaty basqarmasynyń basshysy Nurlan Sydyqov stýdenttik ózin ózi basqarý júıesin damytý baǵytynda uıymdastyrylyp otyrǵan basqosý eń aldymen tájirıbe almasý úshin, atqarylǵan jumystardy qorytyndylap, jospardy aıqyndap alý úshin qajettigin atady.
Forýmnyń plenarlyq májilisi tústen keıin stýdenttik ózin ózi basqarý organdary men stýdenttik jastar uıymdarynyń qyzmetiniń tıimdiligin attyrýǵa arnalǵan jıynǵa ulasty. Toptyq dıskýssııa túrinde ótken jıyn sońynda usynystar men pikirler negizinde jastar uıymdarynyń jumysyn damytýǵa arnalǵan tujyrymdama bekitildi.
Aınash ESALI,
«Egemen Qazaqstan»
ALMATY