Bas Prokýror Ashat Daýylbaev pen Bala quqyqtary jónindegi ýákil Zaǵıpa Balıeva kámeletke tolmaǵandardyń quqyqtaryn qorǵaý máseleleri boıynsha ózara yntymaqtastyq týraly memorandýmǵa qol qoıdy.
A.Daýylbaev balalardyń amandyǵyn jáne qorǵalýyn qamtamasyz etý memlekettiń negizgi ulttyq basymdyqtarynyń biri bolyp tabylatynyn atap kórsetti. Sondaı-aq, Bas Prokýror Bala quqyqtary jónindegi ýákil ınstıtýtyn qurý balalardyń sózsiz qorǵalýy kerektigi týraly konstıtýsııalyq normany júzege asyrýdyń kezekti bir qajetti qadamy boldy, dedi.
Memorandým aıasynda taraptar balalardyń quqyqtary men múddelerin qorǵaý salasyndaǵy kókeıkesti máselelerdi qaraýǵa, anyqtaýǵa jáne olardy sheshý jolyndaǵy keshendi sharalardy qabyldaýǵa baǵyttalǵan kúsh-jigerdi biriktirýge nıetti ekendikterin bildirdi. Qujattyń negizgi maqsaty is-árekettiń ashyqtyǵy jáne tıimdiligi qaǵıdalary negizinde balalar quqyqtarynyń kepildigi men zańdy múddelerin qamtamasyz etý, olardyń buzylǵan quqyqtary men bostandyqtaryn qalpyna keltirý boıynsha birlesken jáne kelisilgen áreketter jasaý bolyp tabylady.
Atqarylǵan jumystardyń tıimdiligin arttyrý jónindegi ortaq usynystardy júzege asyrý úshin taraptar ózara is-qımyldyń ártúrli formalaryn paıdalanýǵa, aqparatpen turaqty almasýdy jolǵa qoıýǵa kelisti. Atap aıtqanda, kámeletke tolmaǵandardyń quqyqtary men zańdy múddelerin qozǵaıtyn zańnamany taldaý jáne olardy jetildirý boıynsha usynystar engizý, balalardyń quqyqtaryn qorǵaý salasyndaǵy aqparatpen turaqty almasý, azamattyq qoǵam ókilderimen baılanysty keńeıtý baǵyttarynda iske asyrý josparlanýda.
Sondaı-aq, Bas Prokýror kámeletke tolmaǵandardyń quqyqtaryn qorǵaý prokýratýra qyzmetiniń basym baǵyttarynyń biri bolyp tabylatynyn atap kórsetti. 2015 jyly kámeletke tolmaǵandar týraly zańnamanyń qoldanylýyn qadaǵalaý salasynda 2 278 tekseris júrgizildi, 91 614 zań buzýshylyq anyqtaldy. Prokýrorlyq qadaǵalaý sharalarymen 8 302 adam tártiptik, 2 707 ákimshilik, 323 materıaldyq jaýapkershilikke tartyldy, 54 qylmystyq quqyq buzýshylyq boıynsha sotqa deıingi tergeý bastaldy. 269376 kámeletke tolmaǵandardyń konstıtýsııalyq quqyqtary qorǵaldy, dep habarlady Bas prokýratýranyń baspasóz qyzmeti.