aıasyndaǵy alqaly jıyn Astanada ótti
Keshe «2006-2016 jyldarǵa arnalǵan genderlik teńdik strategııasyn júzege asyrýdyń aldyn ala qorytyndylary» taqyryby boıynsha halyqaralyq konferensııa bolyp ótti. Oǵan Memlekettik hatshy, Qazaqstan Prezıdenti janyndaǵy Áıelder isteri jáne otbasylyq-demografııalyq saıasat jónindegi ulttyq komıssııa tóraıymy Gúlshara Ábdiqalyqova, Parlament depýtattary, mınıstrler, Ulttyq komıssııa músheleri, shet memleketterdiń elshileri, halyqaralyq jáne úkimettik emes uıymdardyń mamandary, otandyq sarapshylar men BAQ ókilderi qatysty.
Konferensııa jumysynyń alǵashqy sózin Memlekettik hatshy G.Ábdiqalyqova alyp, elimizdegi genderlik saıasat aıasynda júzege asyp otyrǵan mańyzdy qadamdarǵa toqtaldy.
– Osydan týra 11 jyl buryn Qazaqstan Prezıdenti Nursultan Nazarbaevtyń tapsyrmasyna sáıkes, «2006-2016 jyldarǵa arnalǵan genderlik teńdik strategııasy» ázirlendi. Bul jobanyń qabyldanýy saıası sananyń bıiktigin kórsetti, ol azamattyq jaǵynan belsendi qoǵam qalyptastyrý jolyndaǵy batyl sheshim boldy, – dedi ol.
Memlekettik hatshy, sondaı-aq, elimizde genderlik teńdikti ilgeriletý úshin damyǵan ınstıtýttyq negiz qurylǵanyn, áıelderdiń áleýmettik-ekonomıkalyq, qoǵamdyq-saıası múmkindikteri keńeıtilgenin, halyq densaýlyǵynyń nyǵaıyp kele jatqanyn, azamattardyń rýhanı-adamgershilik damýyna jaǵdaı jasalynǵanyn aıtty.
Jalpy, atalǵan strategııany iske asyrý barysynda Qazaqstan 10 jylda aıtarlyqtaı nátıjelerge qol jetkizdi. Elimizde áıel teńdigi degen uǵym men olardyń er-azamattarmen úzeńgiles memlekettik qyzmette jumys jasaýy úırenshikti jaıtqa aınaldy. Osy tusta názik jandylardyń bilek sybana jumys istep, bir otbasyn asyraýǵa qabiletti ekeni belgili boldy. Áıelder qaýymy bılik basynda da ózderiniń isker de jaýapty ekendikterin dáleldedi.
Búginde Parlament Májilisinde áıelder úlesi 27,1 paıyzdy quraıdy. Bul kórsetkish 2006 jyly 10,4 paıyz bolatyn. Osydan-aq Qazaqstandaǵy genderlik teńdik strategııasynyń oryndalý barysyn ańǵarý qıyn emes.
– El ekonomıkasynyń damýyna qyz-kelinshekterdiń qosqan úlesi artýda. Máselen, osydan 10 jyl buryn bıznes tóńiregindegi áıelderdi orta eseppen 38 paıyz dep alsaq, qazir bul kórsetkish 50 paıyzǵa artty. Sonymen qatar, bilim men densaýlyq salasynda eseli eńbek etip júrgenderdiń derligi osy jandar, – dedi G.Ábdiqalyqova.
Konferensııada «Damý» baǵdarlamasynyń Qazaqstandaǵy turaqty ókili Norımasa Shımomýra sóz alyp, BUU tarapynan genderlik saıasat tóńiregindegi atqarylyp jatqan jumystarǵa toqtaldy. Ol: «О́tken jyly Nıý-Iorktegi BUU-nyń shtab páterinde álem kóshbasshylary «Genderlik saıasatty jetildirý men damytý baǵytynda – 2030» baǵdarlamasyn jasady. Onda memlekettik saladaǵy áıelderdiń áleýmettik-ekonomıkalyq damýǵa úles qosyp júrgen róli basty nazarǵa alynǵan, – dedi.
Sondaı-aq, ókil Qazaqstannyń ustanǵan saıasaty men Memleket basshysynyń kóregen kóshbasshylyǵynyń arqasynda elde yntymaq pen birlik, tatýlyq jáne áıel teńdigi oryn alǵanyn jetkizdi. Munan keıin alqaly jıynda shetelderdiń elshileri men mınıstrler baıandamalar jasady. Olar respýblıkamyzdaǵy genderlik jáne otbasylyq-demografııalyq saıasatty odan ári damytýdyń basym baǵyttaryn belgilep, tıisti tapsyrmalar alǵanyn málimdedi.
Jıyn sońynda elimizde otbasy ınstıtýtyn nyǵaıtý maqsatynda Prezıdenttiń tapsyrmasyna sáıkes, jyl saıyn «Mereıli otbasy» ulttyq konkýrsy ótkizilip turatyny, munyń ózi genderlik teńdik strategııasynyń bir jemisi ekeni aıtyldy.
Talǵat RAIYMBEK,
«Egemen Qazaqstan»