Qarajal qaıtip kún kórer?
Qarajal qala mártebesin 1963 jyly aldy. Sol kezde qalada jalǵyz ǵana bank bólimshesi jumys istedi. El egemendik alǵan tusta ol BTA banktiń bólimshesi bolyp qaıta quryldy. Keıinnen bul bank bólimshesi jabylyp, onyń ornyna «Kazkommersbank» AQ-tyń bólimshesi ashylyp, jaǵdaıymyz tipti de jaqsara túsken bolatyn. Qala turǵyndary jalaqysyn, zeınetaqysyn, balalardyń járdemaqysyn, Uly Otan soǵysynyń ardagerleri men tyl eńbekkerleri zeınetaqylaryn, «О́rken-Atasý» taý-ken kombınatynyń jumysshylary eńbekaqylaryn osy bank bólimshesinen alyp júr. Bank qyzmetkerleri jumystaryna tııanaqty, kishipeıil, ádepti. Qarajal turǵyndary atynan alǵystan basqa aıtarymyz joq.
Endi osy «Kazkommersbank» AQ bólimshesin joǵarǵy jaqtaǵylar «jabamyz» dep habar jiberipti. Bul Qarajal qalasy halqynyń basyna jaı túskendeı áser etti. Nege deseńiz, «Kazkommersbank» AQ bólimshesinen nesıe aldyq, bıznes salasyndaǵy qyzmetkerlerdiń esepshottary bar, basqa bank júıesine aqsha aýdarady, depozıtterimiz bar. Bul bank bólimshesi jabylsa qaı bankke baramyz?
Qarajal qalasynda eki bank bólimshesi bar, biri – osy «Kazkommersbank» AQ, ekinshisi «Halyq banki» AQ. Jıyrma myńǵa jýyq halqy bar Qarajal qalasyna bir bank álbette azdyq etedi. Klıentterine qyzmet kórsetip úlgere almaıdy dep oılaımyz. «Kazkommersbank» AQ bólimshesinen alǵan nesıelerimizdi qaı bankke aparyp tóleımiz, depozıtterimizdi qaıda saqtaımyz? Oblys boıynsha Qarajal eń shalǵaıda ornalasqan qala – Jezqazǵan qalasy 300 shaqyrym, Qaraǵandy qalasy bolsa 420 shaqyrym qashyqtyqta. Qazirgi naryq qysyp turǵan zamanda Qarajal qalasynda turatyn halyqtyń jaǵdaıyn kim oılaıdy? Qarajal qalasynda ornalasqan «Kazkommersbank» AQ bólimshesiniń jabylmaýyna kim septigin tıgize alar eken? Mundaǵy eldiń janaıqaıyna qulaq salar kim bar-aý?
Aýdanbaı ASANBAEV
Qaraǵandy oblysy