Oblystyq fılarmonııada Kenjebek Kúmisbekov atyndaǵy qazaq ulttyq aspaptar orkestriniń kúı atasy Qurmanǵazynyń shákirti, Qazaq KSR-niń halyq ártisi, kúıshi Dına Nurpeıisovanyń 155 jyldyǵyna arnalǵan «Ásem qońyr» atty konserti bolyp ótti.
Dına jastaıynan Dáýletkereı, Músiráli, Álkeı, Túrkesh, Uzaq, Esjan, Baıjuma, Balamaısań sııaqty kúıshilerdiń kúıin náshine keltire tartyp, ózi týǵan aımaqqa «dombyrashy qyz» degen atpen tanylǵan. Qarshadaı qyzdyń dańqyn estip, áıgili Qurmanǵazy arnaıy izdep keledi. Ol Dınanyń dombyra tartysyna súısinip, bolashaǵynan úlken úmit kútip, batasyn bergen. Osydan keıin Dınadan kóz jazbaı, únemi aınalyp soǵyp, dodaly kúı tartystaryna ertip baryp, dombyra tartýdyń tereń syrlaryn úıretedi.
Kúıshiniń shyǵarmashylyǵyn ǵalymdar eki kezeńge bólip qaraıdy. Birinshisi, revolıýsııaǵa deıingi, ekinshisi keńestik zamandy qamtıdy. Kókshetaýdaǵy konsert osy eki kezeńdi de tolyq terbetip, kórermen júregine qondyra bildi.
Turlyqoja Bazarov pen Rýslan Qoıshybaevtyń dırıjerligimen Dınanyń «Ásem qońyr», «О́ttiń dáýren», «Partııa», «On altynshy jyl» sııaqty kúıleri orkestrmen shertilse, «Mereke» kúıin kórermender Azamat Aıqyshevtyń jeke oryndaýynda tyńdady. Sondaı-aq, «Jeńis» kúıin Almas Omarov, «Jigerdi» Qurmet Seıit, «Domalatpaıdy» Ásel Beısembına, «Baıjumany» Qaıyrbek Qarabaev úlken sheberlikpen oryndap shyqty.
Sonymen qatar, Qurmanǵazy Saǵyrbaıulynyń, Nurǵısa Tilendıevtiń, Aıtqalı Jaıymovtyń, Nurlan Bekenov pen Berik Orazalınniń shyǵarmalary Kókshe tórinde ásem naqyshpen qalyqtady.
Baqbergen AMALBEK,
«Egemen Qazaqstan»
Aqmola oblysy