QARAǴANDY. 23 sáýir. Qaraǵandy oblysynda avtokóligine 250 kılo zańsyz aýlanǵan balyq tıegen brakoner ustaldy. Bul týraly oblystyq ishki ister departamentiniń (IID) baspasóz qyzmetine silteme jasaǵan egemen.kz tilshisi habarlady.
Qaraǵandy oblystyq IID jergilikti polısııa qyzmetine qarasty tabıǵatty qorǵaý polısııasynyń qyzmetkerleri «Ýyldyryq» reıdtik is-sharasy kezinde «Balqash-Saıaq» avtojolynda «ÝAZ» markaly avtokólikti toqtatqan. Tekserý barysynda 47 jastaǵy er adamǵa tıesili atalǵan mashınanyń ishinen bes qapqa salynǵan salmaǵy 250 kılo bolatyn balyq tabyldy.
Qazirgi tańda saraptama taǵaıyndalyp, keltirilgen shyǵyn anyqtalyp, sotqa deıingi tergeý amaldary júrgizilýde.
Qaırat Ábildınov.
Derek, foto: Qaraǵandy oblystyq ishki ister departamentiniń baspasóz qyzmeti.