ALMATY. 24 sáýir. Búgin tańerteń saǵat 08:30-da Tuńǵysh Prezıdent saıabaǵynda qala ákimi Baýyrjan Baıbek sóz sóılep ashyp, ózi júgirýdi bastap bergen marafon márege jetýge jaqyn. Jarys uıymdastyrýshylardyń málimetine qaraǵanda marafonǵa 13 myńǵa jýyq adam qatysýda. Qala ákimi atap kórsetkendeı, halyqaralyq dárejege jetken marafonǵa atsalysýshylardyń sany qalada ótken sońǵy jaryspen salystyrǵanda 2 esege ósken. Bul týraly egemen.kz tilshisi habarlady.
Ál-Farabı dańǵylyndaǵy jaıaý jarysqa qala turǵyndary, halyqqa tanymal tulǵalar, sport jáne óner juldyzdary da qatysty. Olardyń qatarynan álemdik ataǵy bar tanymal velosportshy Aleksandr Vınokýrovty, ánshi Qaırat Nurtasty, rejısser Nurtas Adambaevty, bankır Bolat Jámishevti kórýge bolady.
Mańyzdy da aýmaqty sharanyń josparlanǵandaı ótýine ádettegideı Almaty qalasynyń ishki ister departamentiniń qyzmetkerleri tııanaqty qyzmet kórsetip, atsalysty.
«Bıyl qalamyzda mereıtoılyq besinshi ret ótip otyrǵan sharaǵa departament basshylyǵy da qaıyrymdylyq nıetpen qatysýǵa nıet bildirdi. Sporttyq sharadaǵy qaýipsizdik pen jol qozǵalysyn qadaǵalaý qyzmeti polıseılerdiń moınynda bolǵandyqtan da, bir bólimsheniń qyzmetkerleri óz mindetterin atqarýmen birge jarysqa qatysýda. Jalpy, Almaty gornızony sporttyq mádenı buqaralyq sharalardan eshýaqytta shet qalǵan emes. Almaty polıseıleri osymen ekinshi ret marafonǵa sporttyq úlgide qatysyp otyr», – deıdi qalalyq ishki ister departamentiniń resmı ókili polısııa maıory Saltanat Ázirbek.
Jarystyń alǵy sharty qaıyrymdylyq sharasyn jasaý bolǵandyqtan, marafonǵa qatysýshylar 2 myń men 4 myń teńge aralyǵynda jarnalyq aqsha tóledi. Jınalǵan qarajat qaladaǵy ARDI balalardy saýyqtyrý ortalyǵynyń shotyna túsedi.
Marafon Ortalyq stadıonda aıaqtalady.
Talǵat Súıinbaı.
Derek, sýret: egemen.kz.