ASTANA. 24 sáýir. Irak astanasy Baǵdadta bolǵan qos jarylystan 12 adam qaza tapty. Bul týraly 24.kz-ke silteme jasaǵan egemen.kz tilshisi habarlady.
Alǵashqy jarylys qalanyń soltústigindegi baqylaý beketteriniń birinde boldy. Bul mańaıda lańkestik áreketten 9 adam mert bolyp, 28 adam zardap shekti. Al ekinshisi shahardyń ońtústigindegi áskerı kólikterdiń janynda oryn aldy. Saldarynan 3 adam opat bolyp, 11 turǵyn túrli deńgeıde jaraqat aldy.
Resmı málimetter boıynsha, jarylǵysh zattardyń bári avtokólikterge ornatylǵan. Lańkestik shabýyldy qaı toptyń jasaǵany belgisiz. Ázirge bul isti eshbir uıym óz moınyna alǵan joq. Alaıda, boljam boıynsha bul iske de «Irak pen Levant uıymynyń» qatysy bolýy múmkin.
Aıta keteıik, atalǵan toptyń jankeshtisi 22 sáýir kúni qaladaǵy meshitterdiń birinde ózin ózi jaryp jibergen. Terrorlyq shabýyldan 9 adam kóz jumdy. Sondaı-aq, osy áreketti meshit syrtynda taǵy bir ekstremıst júzege asyrmaq bolǵan. Biraq tártip saqshylary der kezinde baıqap, aldyn alyp úlgerdi. Birikken Ulttar Uıymynyń málimetteri boıynsha Irakta osy jyldyń aqpan aıynan beri barlyǵy 670 adam qaza taýyp, 1290 beıbit turǵyn jaralanǵan.
Aıan Ábdýálı.
Derek, foto: 24.kz.