Gennadıı Golovkınniń 35-shi jeńisi

О́tken jeksenbi kúni tańerteń AQSh-tyń Los-Andjeles qalasynyń «Forým» sport arenasynda WBA, IBF, IBO nusqalary boıynsha álemniń orta salmaqtaǵy chempıony jáne WBC versııasy boıynsha ýaqytsha ataq ıegeri Gennadıı Golovkın óziniń kásipqoılar rıngindegi 35-shi jekpe-jegine shyǵyp, kezekti jeńisine jetti. Osylaısha kil utystardan turatyn serııasyn odan ári jalǵastyrǵan qazaqstandyq dańqty bylǵary qolǵap sheberi bul kúni amerıkalyq Domınık Ýaıtty 2-raýndtyń bas jaǵynda-aq nokaýtqa jiberdi. Sóıtip, merziminen buryn bitirgen shaıqastary sanyn 32-ge toltyrdy. Sonyń ishinde sońǵy 22 urysyn qatarynan túgel nokaýtpen aıaqtady. Shyny kerek, 34 jastaǵy Gennadıı Golovkınniń IBF boljamy chempıondyǵynan 26 jasar mindetti úmitker Domınık Ýaıtty óte-móte tez iske alǵysyz etip tas­taýy kópshiligimiz úshin kútpegen oqıǵa boldy. Olaı bolatyny, tap osy aıqastyń qarsańynda qazaqstandyq tarlannyń buǵan deıin sharshy alańǵa 18 ret kó­terilip, sonyń bárinde je­ńiske jetken jáne olardyń 12-sin nokaýt­pen tııanaqtaǵan qarsy­lasynyń ońaı shaǵyla salatyn jańǵaq emes ekeni týraly áralýan aýqymdaǵy áńgimeler kóp qozǵalǵan. Munyń ústine, óz elinde óner kórsetetin Ýaıttyń jergilikti jankúıerlerdiń qýatty qoldaýyna arqa súıep, baryn salatyny da qaperden qaǵas qal­ǵan joq. Soǵan qaramastan, qazaqstandyq sportsúıer qaýym arasynda Golovkınniń jeńis toıy­n toılaıtynyna kúmán keltirgen kórermenniń kezdespegenin de aıta ketýimiz kerek. Biraq urystyń uzyn-yrǵasy bulaısha bastalmaı jatyp, baıanyna jetip tynatynyn bizdiń eń bir alyp-ushpa kóregenderimizdiń ózderi kúni buryn dóp basyp, dittep aıta almaǵan. Jurttyń basym kópshiligi sonda saıysqa úkilep qosyp otyr­ǵan saıypqyrandary jetinshi raýnd­tyń shamasynda sharshy alań­nyń shańyn shyǵaratynyna shıyrlap toqtaǵan. Alaıda, aýyl óziniki bolsa da, aıbatyn ózine qarata alm­aǵan amerıkalyq sportshy shý degennen-aq GGG-niń temirdeı tegeýrinine tótep bermesin tanytyp qoıdy. Jekpe-jek eki boksshynyń bir-birine barlaý jasap, baıqap kórgen baıaý qımyldarynan bas­talǵanymen, kóp uzamaı Gen­nadıı birtindep tizgindi týyrlap, óz qolyna ala berdi. Osy tusta bizdiń altyn aıdar, shoq bel­beýli jigitimiz degdisi qaıtpas dú­leı kúshtiń egesi ekenin álsin-álsin álemettep bildirip turdy. Onyń sýylynan sýyq lep saýlaǵan surapyl soqqylary ári-beriden soń qarsylasynyń digerin alyp, deg­birin qashyra bastady. Aqyry sol quıyndaı uıytqyǵan zymyran zardaptardyń biri ádepki raýndtyń sońǵy sátterinde sóde­geı júris, sóleket qımyldan asa al­maǵan Domınıkti jazyq jerde jalp etkizip, baýdaı domalatyp túsirdi. Onyń erteli-keshti eńbegin esh, jigerin qum etip ketýden sonyń sońyn ala ile-shala soǵylǵan gong qutqaryp jiberdi. Áıtkenmen, ekinshi raýnd basyndaǵy en-apat ýaqyt Ýaıttyń ottaı oraqshy, jaýdaı qaraqshy bolyp andaǵaılap jaýǵan qalyń soqqylardan aman shyǵýyna yryq bermedi. Bul aralyqta úıdeı jerge qazyq qaǵyp, kóleńkesine buzaý baılatqandaı erkin tirlikti endeı keshken ol alqymyna aıtarlyqtaı kóp mezgil salmaı, vızavıin taǵy eki ret murttaı ushyryp túsirdi. Alańdaǵy arbıtr munyń birinshi páıtinde boksshynyń judyryq siltesken muqylash meselin jal­ǵas­tyrýyna mursat berse, kele­sisinde kelesi kelmeı turǵanyn anyq ańǵaryp, onyń saýlyǵyna salaýat tilep, aıqasty birden toq­tata qoıdy. Nokaýt! Qulaı-ja­tystyń áýelgi ekeýi nokdaýn sanalsa, sońǵysy taza nokaýt boldy. Sóıtip, kúni boıy zaldyń ishin dýy­lymen jańǵyryqtyryp, keneý­deı kernetip kelgen jergilikti jankúıerler kúlkileriniń ernin kezertip, áp-sátte pyshaq kes­kendeı kilt kidirtti. Endi silti­deı tynǵan tynyshtyq aýanyn qazaq­standyq fanattar qaýymy buzyp-jaryp, tikesinen tik kóterip áketti. Bul bir jaǵy Gennadıı Golov­kınniń bıylǵy maýsymdaǵy birinshi urysy edi. Ol munyń aldynda sońǵy ret budan alty aı buryn, ótken jyldyń qa­zan aıynda rıngke shyǵyp, kanadalyq Davıd Lememen qolǵap túıistirgen. Onda da shaıqas bastalmaı turyp, qarsylasy biraz aıbat shegip baqqan. Biraq baryn asynyp, baqanyn taıanyp kelgen boksshyny Gena birinshi raýndtan bastap táýbesine keltirip, táýine jyǵyldyrǵandaı bolǵan. Degenmen, bizdiń batyrdyń ba­sym­dyǵymen ótken jekpe-jek toǵyzynshy raýndqa deıin jetip, Lemeniń nokaýtqa túsip qalýymen túgesilgen. Jalpy, Golovkınniń kezdesýdi belgilengen ýaqytynyń shegine sheıin jetkizýdi qoıǵanyna qazir týra segiz jyl bolypty. Ol sońǵy ret 2008 jyly Amar Amarımen ushyrasqanynda ǵana barlyq toǵyz raýndtyń aqyryna barypty. Al sodan eki jyl buryn, ıaǵnı 2006 jyly kásipqoılar aıasyndaǵy mansabyn bastap ketken boksshy osy kezge deıin 156 raýndta atoı salǵan eken. Sonda orta eseppen ár shaıqasyn 4,4 raýndta aıaqtap otyrǵan. Sol aıqastarda onyń aldynda qaýqarsyzdyq tanytqandar sapynda Vıllı Monro-kishisi, Marko Antonıo Rýbıo, Martın Mıýrreı, Danıel Gıl, Mettıý Maklın sekildi boks álemine attary máshhúr belgili saıyskerler boldy. Gennadıı Golovkın osymen óziniń ataǵyn 15-shi márte qor­ǵap shyqty. Urys «Qaraǵandy qabylanynyń» barynsha b­a­sym­dylyǵymen ótkenin ersili-qar­syly shot qaqqan statıstıka ma­­­­mandary da aıqyndap berdi. Compubox málimetteri boıynsha, eki raýndqa tolar-tolmas merzim ishinde Gennadıı 133 soqqy jasap úlgeripti. Sonyń 54-i, ıaǵnı 40,6 paıyzy qarsylasyn kókala qoıdaı etýge jetip jatty. Onyń ishinde GGG 71 djebtiń 24-in, ıakı 33,8 paıyzyn básekelesine dóp tıgizse, 62 ret siltegen qatty soqqysynyń 30-y kózdegen kóbe­sin kósip ótken. Munyń bári Ýaıt­tyń kórsetkishinen kóp ilgeri. Onyń jalpy soqqysynyń sany Golovkınniń mólsheriniń jartysynan sál ǵana asady – 75. Biraq dál tııý deńgeıi tipti tómen, nebári 29,3 paıyzǵa ǵana jetken. Muny sońynda ótken baspasóz máslıhatynda Domınıktiń ózi de esh mekersiz moıyndady. «Golov­kınniń kúshi – shynaıy kúsh, ol – uly chempıon. Boksshy men kútkennen de myqty bolyp shyqty. Men rıngte ózimdi tanytýǵa tyrysyp-aq baqtym. Biraq onyń soqqysy tıgennen keıin muny jasaýdyń qıyn ekenin túsine tústim. Endi onyń osy qalpynda chempıon bolyp tura berýi úshin barlyq múmkindikteri bar», dedi ol. Eń sońynda. Urys basta­lar aldynda boksshylar salmaq­ta­ryn ólshegen edi. Onda qazaq­stan­dyq boksshynyń qarsy­la­syna qaraǵanda jeńildeý ekeni anyqtaldy. Sol sııaqty Golov­kınniń osy jeńisi arqyly 2 mıllıon, al Ýaıttyń 500 myń dollar aqy alatyny da jarııa etildi. Aıtqandaı, osy urys bit­ken boıda Búkilálemdik boks asso­sıa­sııasynyń (WBA) basshysy Hılberto kishi-Mendosa má­lim­degendeı, Golovkınniń en­digi qar­sylasy meksıkalyq Saýl «Ka­ne­lo» Alvares pen brı­ta­nııa­lyq Amır Hannyń utqa­ny nemese amerı­kalyq Danıel Djeı­kob bolady. Serik PIRNAZAR, «Egemen Qazaqstan»