«Astana-Balet» teatry» úsh kúnge jalǵasatyn gastroli aıasynda almatylyqtar úshin, balet ǵalamatyn pash etpek. Abaı atyndaǵy Qazaq memlekettik akademııalyq opera jáne balet teatrynyń sahnasynda mamyr aıynyń tórti men altysy aralyǵynda kórermen qaýym jas ujymnyń tyń týyndylaryn tamashalaı alady.
«Birinshi kúni «Bı ǵalamaty» baǵdarlamasy usynylmaq. Onyń birinshi bóliminde «Álem», ekinshi bóliminde – 2016 jyldyń 12 aqpanynda premerasy ótken «Gaia» baletinen úzindi kórsetilmek. Atalǵan qoıylymdardy tamashalaı otyryp, kórermen qaýym bizdiń ujymnyń shyǵarmashylyq jolyn da kóz aldaryna elestete alady. Ekinshi kúni «Bir aktili baletter keshi» ótedi. Kórermen nazaryna «GAIA» men «Karmen» baletteri jol tartpaq. «Karmen» baletin 2015 jyly «Astana-Balet» teatrynyń» Sankt-Peterbýrgte ótken gastroli aıasynda «Appaq tún juldyzdary» festıvalinde jurtshylyq zor yqylaspen qabyldaǵan bolatyn. Tanymal horeograf Borıs Eıfman, sonymen qatar, peterborlyq synshylar qaýymy spektakldi joǵary baǵalap, jaqsy pikir bildirgen edi. Gastroldiń sońǵy kúni almatylyqtar «Astana-Balet GALA» baǵdarlamasyn tamashalaı alady. Baǵdarlamaǵa engen bılerden Uly dala samaly esip, Taıaý Shyǵys saryndary tanylady. Bul bıdiń kópshiligine Eýropa men Amerıka jurtshylyǵy tánti bolǵan edi», – dedi «Astana-Balet» teatrynyń dırektory Valerıı Kúzembaev.
«Astana-Balettiń» ǵalamat gastroli talǵampaz qaýymdy eleń etkizbeı qoımas. Baletsúıer qaýym bıshilerdiń jańa býynyn jyly yqylaspen qabyldap, osy gastrol Almatynyń mádenı tynysyna tyń serpin ákeler degen úmittemiz», – dedi ol.
Raýan QAIDAR,
«Egemen Qazaqstan»