Jaqynda issaparmen ońtústik oblystarǵa jolym tústi. Sońǵy kezde qyzyl mııanyń shetelge satylyp jatqanyn jıi estıtin edim. Soǵan issaparda anyq kózim jetti.
Qyzylorda oblysynyń Syrdarııa ózenine jaqyn eldi mekenderdiń birinde pysyqaılar baǵaly shópti úlken qorapty kólikterge tıep, Qytaıǵa ótkizip jatyr eken. Odan paıda taýyp jatqandary da shamaly. Kúnine kólikke tıep, Túrkistan asyryp satqany úshin nebári 2 000 teńge ǵana alady.
Al qyzyl mııanyń untaq retinde óndiriste qoldanylatyn tamyrynda glıkozıd, saharoza, efır maıy, mıneraldy tuzdar, qyzyl mııa qyshqyly, kúrdeli qanttar jáne krahmal sııaqty kóptegen dárýmender bar. Osy qasıetterine baılanysty óskin medısına men tamaq ónerkásibinde paıdalanylady. Budan basqa, onyń japyraǵy men sabaǵy erteden mal azyǵy retinde daıyndalyp keledi.
Jergilikti turǵyndardyń aıtýlaryna qaraǵanda, qyzyl mııa jerdiń qunaryn saqtaýshy da kórinedi. Qazir osynaý óskinge qyrǵıdaı tıip, shetelge satyp jatqan kesapattardyń kesirinen soqamen qoparylǵan jerler batpaqqa, sor topyraqqa aınalyp jatyr. Eń qorqynyshtysy, atalmysh óskinniń tátti tamyryn soryp kúneltetin jándikter, qurt-qumyrsqalar jer betine shyǵyp, baqshalyq daqyldar men jemis aǵashtaryn baýdaı túsirýde. Endi buǵan shuǵyl shara qoldanbasa bolmaıdy.
Eskendir ERTAI,
jýrnalıst
Qyzylorda oblysy