TARAZ. 3 mamyr. Keshe saǵat 14.20-da Taraz qalalyq ishki ister basqarmasy JBO-nyń «102» tetigine belgisiz áıelden óz úıiniń mańynda qaraqshylyq shabýyl jasalǵany týraly habarlama túsken. Bul týraly Jambyl oblysynyń ishki ister departamentiniń baspasóz qyzmetine silteme jasaǵan egemen.kz tilshisi habarlady.
Onyń aıtýy boıynsha, belgisiz eki adam qarýmen qaýip tóndirip, onyń týystaryna alyp bara jatqan 2,5 mıllıon teńgeden astam aqshasy bar sómkesin tartyp alǵan. Oqıǵa ornyna shuǵyl túrde «Qaısar» jedel qımyldaıtyn toby men Taraz qalalyq IIB 2-PB JTT jiberildi. Jábirlenýshi polısııaǵa habarlasqanǵa deıin belgisiz adamdardy ustaýǵa tyrysqan 22 jastaǵy er adam oqıǵanyń kýágeri bolǵan. Qaraqshylardy qýý barysynda ol aıaǵyna atylǵan oqtan jaraqat alǵan.
Qylmysty jasaǵan kúdiktiler oqıǵa ornyna jaqyn jerden ustaldy. Olardy izdestirý jáne ustaýǵa 10 mınýtqa jýyq ýaqyt ketken.
Atalǵan derek boıynsha QR QK-nyń 192-baby 3-b. 2-t. (qaraqshylyq shabýyl) jáne 287-baby 1-b. (qarýdy zańsyz saqtaý) boıynsha qylmystyq is qozǵaldy. Birqatar saraptamalar taǵaıyndalyp, sotqa deıingi tergeý amaldary júrgizilýde. Kúdiktiler ýaqytsha ustaý ızolıatoryna qamaqqa alyndy.
Oqıǵa kýágeri bolǵan azamat der kezinde medısınalyq kómek aldy, onyń ómirine eshqandaı qaýip tónip turǵan joq, qazirgi ýaqytta em alýda.
Búgin Jambyl oblysy IID bastyǵynyń kadr jumystary jónindegi orynbasary Qalıjan Shońǵarbaev jaraqat alǵan jas jigitke baryp, onyń jaǵdaıyn surap qaıtty. Oǵan belsendi azamattyq ustanymy men nemquraılylyq tanytpaǵany úshin, sondaı-aq onyń anasyna osyndaı uldy tárbıelegeni úshin alǵysyn bildirdi.
«Onyń jasaǵan áreketi úlgi tutarlyq qadam bolyp tabylady. Qylmyskerlerdi qolǵa túsirý boıynsha árekettestik tanytqany úshin biz ony Ishki ister mınıstrliginiń arnaıy marapatyna usynatyn bolamyz», dedi Qalıjan Shońǵarbaev.
Oralhan Dáýit.
Derek, foto: egemen.kz