Keshe Premer-Mınıstr Kárim Másimovtiń tóraǵalyǵymen ótken Úkimettiń kezekti otyrysynda jer reformasy boıynsha komıssııa qurý týraly Memleket basshysy Nursultan Nazarbaevtyń tapsyrmasyn iske asyrý barysy qaraldy, dep habarlady Premer-Mınıstrdiń baspasóz qyzmeti.
Atalǵan másele boıynsha Premer-Mınıstrdiń birinshi orynbasary – komıssııa jetekshisi Baqytjan Saǵyntaev baıandady. Komıssııa quramyna Parlament Májilisi men Senatynyń depýtattary, Úkimet músheleri, saıası partııalardyń, agrobıznestiń, salalyq qaýymdastyqtardyń ókilderi, ǵalymdar jáne azamattyq belsendiler kiredi. Sonymen qatar, óńirlerdi de kóptep qamtý úshin komıssııa jumysyna qoǵamdyq keńester de tartylatyn bolady.
Sondaı-aq, otyrysta komıssııa jumysyn uıymdastyrý máselesi boıynsha Aýyl sharýashylyǵy mınıstri Asqar Myrzahmetov pen Aqparat jáne kommýnıkasııalar mınıstri Dáýren Abaevtyń habarlamalary tyńdaldy.
Komıssııanyń saıası partııalarmen, qoǵamdyq uıymdarmen jáne óńirlermen ózara is-qımyly týraly «Nur Otan» partııasy Tóraǵasynyń birinshi orynbasary Muhtar Qul-Muhammed, komıssııa jumysyndaǵy Ulttyq kásipkerler palatasynyń róli týraly «Atameken» UKP basqarma tóraǵasy Abylaı Myrzahmetov sóz sóıledi.
Talqylaýdy qorytyndylaı kele, Kárim Másimov komıssııa jumysynyń elimiz jurtshylyǵy úshin mańyzyn atap kórsetti. Úkimet basshysy osyǵan baılanysty Aqparat jáne kommýnıkasııalar mınıstrligine komıssııa jumysynyń buqaralyq aqparat quraldarynda jarııalanýyn uıymdastyryp, óńirlerde tıisti aqparattyq jumystardy júrgizýdi tapsyrdy.