Sońǵy kúnderi muz aıdyny serileri jankúıerleriniń nazary Máskeý men Sankt-Peterbýrg qalalarynda ótip jatqan álem chempıonatyna aýǵan. Osyǵan saı hokkeıshilerdiń jarysy da kúnnen-kúnge tartysqa tolyp ótip jatyr. Muny 9-10 mamyrda oınalǵan kezdesýlerdiń qorytyndylary taǵy da baıqatty.
Máskeýde A tobyndaǵy komandalar quramynda kúsh synasyp jatqan Qazaqstan quramasy 10 mamyr kúni Norvegııa hokkeıshilerimen kezdesip, 2:4 esebimen utylýǵa májbúr boldy. Soǵan qaramastan, ol sport mamandary men janashyrlary tarapynan jaqsy baǵalar aldy. Sondyqtan bolar, Halyqaralyq muzdaǵy hokkeı federasııasynyń (IIHF) resmı saıtynda keshe jarııalanǵan basty maqala «Qazaqtar arystansha alysty» degen atpen shyqty. Onda Qazaqstannyń match barysynda eki márte esepti teńestirgeni, biraq sońynda tájirıbesi moldaý jáne deńgeıi burynnan joǵary sanalatyn vıkıng eli jamaǵatynyń jeńisti tartyp áketkeni aıtylady.
Match negizinen Norvegııa quramasynyń birshama basymdylyǵymen ótti. Esepti de aldymen solar ashty. Birinshi shaıbany 4-mınýtta Iohannes Iohannessen saldy. Qazaqstandyq Naıdjel Doýs 8-mınýtta tarazy basyn teńestirdi. Ekinshi kezeńde bizdiń qarsylastarymyz biraz kúsh alyp ketti. Olar 34-mınýtta Ken-Andre Olımbtiń kúsh salýymen tablodaǵy esepti 2:1-ge jetkizdi. Oǵan qazaqstandyqtar 36-mınýtta qarymta qaıtardy. Bizden Brendon Bochenskı kózge tústi. Alaıda, 39-mınýtta Matıs Olımb komandasyn taǵy alǵa uzatty. Al sońǵy kezeńde norvegter bizdiń qaqpashysyz oınap jatqan kezimizdi ádemi paıdalanyp, artyqshylyqtaryn arttyra tústi. Sońǵy shaıbany 58-mınýtta Mats Sýkkarello alystan ashyq qaqpaǵa dál uryp túsirdi.
Bul kúni sondaı-aq Shveısarııa Danııany over-taımda 3:2 etip utsa, Fransııa Vengrııany 6:2 etip tize búktirdi. Al Germanııa Slovakııany 5:1 esebimen talqandap, kezekti sensasııaǵa qol jetkizdi. Budan bir kún buryn ótken oıyndar mynadaı nátıjeler ákeldi: Latvııa – Reseı 0:4, Belarýs – Kanada 0:8, Shvesııa – Chehııa 2:4, Fınlıandııa – AQSh 3:2.
Keshe túnde Qazaqstan quramasy shvedtermen kezdesti. Budan bólek, Shveısarııa – Latvııa, Slovakııa – Belarýs, Fınlıandııa – Vengrııa aralarynda oıyndar ótti. Bizdiń jigitter úshin naǵyz sheshýshi shaıqastar aldaǵy kúnderdiń enshisinde tur. Olardyń 13 mamyr kúngi chehtarmen oıynynan kúterimiz az. Alaıda, 14-inde Latvııamen, 16-synda Danııamen kezdesýleri kóp jaıtty anyqtap berýge tıis. Osy oıyndarda komanda taǵdyry sheshiledi.
Taǵy bir aıtatyn nárse, qazir týrnırde Reseı komandasynan keıingi jankúıerdi eń kóp jınaýshy bizdiń jasaq bolyp otyr.
Rýslan IGILIK