Astana. 12 mamyr. Iemende bolǵan lańkestik áreketten 13 adam qaza tapty. Bul týraly 24.kz-ke silteme jasaǵan egemen.kz tilshisi habarlady.
The New Arab basylymynyń aqparyna súıener bolsaq, sodyrlar jarylǵysh zat ornatylǵan úsh kólikti jaryp jibergen. Saldarynan koalısııaǵa qarasty sarbazdar mert boldy. Qazir olardyń azamattyǵy anyqtalyp jatyr. Boljam boıynsha úkimet sarbazdarymen qatar, Saýd Arabııasynyń áskerleri bolýy múmkin.
Zardap shekkenderdiń naqty sany ázirge belgisiz. Qazir olar aýrýhanalarǵa jetkizildi. Dárigerlerdiń aıtýynsha, opat bolǵandardyń sany aldaǵy ýaqytta artýy múmkin.
Oqıǵa ornynda tergeý amaldary júrip jatyr. Resmı málimetter boıynsha, bul isti TGIL ekstremıstik uıymy óz moınyna aldy.
Aıta keteıik, Iemende úkimet áskerleri men terrorlyq toptardyń arasynda qaqtyǵystar jıi bolyp turady. О́tken aıda arnaıy operasııa jumystary kezinde «Al-Kaıda» uıymyna múshe 800 sodyrdyń kózi joıyldy.
Aıan Ábdýálı.
Derek, foto: 24.kz.