Reseı ormandarynan Qazaqstan dalasyna «qonys aýdardy»
Bıyl О́skemenniń mańaıy ushatyn tıinderge tolyp ketti. Bir qyzyǵy, bul janýardyń buryn munda mekeni joq bolatyn. Reseıden júzdegen lekpen kelgen olar endi osy aradaǵy orman men jańa keýekterdi qonystana bastady. Oblys ortalyǵyna jaqyn ornalasqan Tarhan aýylynyń oqýshylary ushatyn tıinderge kómek kórsetý maqsatynda kishkene aǵash úıshikter jasap jatyr. Al jergilikti ormanshylar kútpegen «mıgranttar» úshin alabóten qýanyshty.
– Eger uıasyn salyp, azyǵyn qamdap berýge jaǵdaı jasasaq, ári qaraı kóshe bermeı, bizde qalady dep oılaımyn. Sondyqtan, biz kishkene janýarǵa jaǵdaı jasaý úshin jasandy keýekter oıýdamyz, – dedi ormanshylardyń biri Alekseı Cherepanov.
Mamandar ushatyn tıinderdiń jappaı qonys aýdarýy tirshilikke qolaıly jer izdeýden shyqqanyn aıtady. Olar Qazaqstan aýmaǵyna balqaraǵaı túıinin izdep kelgenge uqsaıdy. Reseıge qaraǵanda, О́skemen mańyndaǵy ormandarda balqaraǵaı, samyrsyn jańǵaqtary mol túsedi. Zoologtardyń pikirinshe, ormandy jańadan mekendeýshiler kóp paıdasyn tıgizýi múmkin. Ushatyn tıinder ormannyń bos jatqan azyqtyq beldeýine ornalasyp qana qoımaı, jergilikti faýnanyń damýyna yqpal etedi ári tabıǵatqa erekshe kórik beredi.
Dýman ANASh,
«Egemen Qazaqstan»
О́SKEMEN