Kitap oqýdyń ult bolashaǵy úshin mańyzy zor. Bilimsiz qoǵam eshqashan da órge basqan emes. Kitap – bilim men ǵylym aıdyny. Mine, osyndaı aıdynymyzǵa taıaýda ǵana taǵy bir qundy eńbek qosylǵanyn jurtshylyqqa qýana jarııalaǵaly otyrmyz.
Ol – dıplomat, jýrnalıst, pýblısıst, fılologııa ǵylymdarynyń kandıdaty, dosent Gúlsim Eńsepovanyń «Folıant» baspasynan jaryqqa shyqqan «Farıza – kósemsóz patshaıymy» atty ǵylymı monografııalyq kitaby. Bul monografııada jurtshylyqqa daraboz aqyn retinde keńinen tanylǵan Qazaqstannyń halyq jazýshysy, Memlekettik syılyqtyń laýreaty Farıza Ońǵarsynovanyń jýrnalıstik, redaktorlyq, pýblısıstik qyry jan-jaqty taldanady. Atalǵan týyndynyń taqyryby men ıdeıasy, kótergen júgi, mán-mazmuny, janrlyq alýan túrliligi jáne stıldik sıpatymen qosa, sýretkerlik sheberligin avtor ǵylymı turǵydan ashyq ta, jatyq tilmen sheber sýretteı bilgen. Shyndyǵynda, biz osy ýaqytqa deıin aqynnyń álemin bir qyrynan ǵana bilip, ony tek sóz qudireti – poezııaǵa ǵana telip júrippiz. Ǵalym Gúlsimniń bir artyqshylyǵy sol, tyń taqyrypty birinshi bolyp kóre bildi jáne der kezinde oqyrmanǵa usynyp úlgerdi. Munymen birge, monografııada aqynnyń kózi tirisinde baspa betin kórmegen shyǵarmalary qamtylǵandyqtan, ǵylymı týyndynyń quny men bási odan saıyn bıikteı túsedi.
Kitapta bul monografııalyq eńbektiń jazylýyna Farıza apaıdyń óz sózi túrtki bolǵany baıandalady. «Apaı jaıly aıtar bolsam» atty essesinde avtor: «Basqosýlardyń birinde apaı: «Eldiń bári meni aqyn deıdi de, jýrnalıst bolǵanymdy aıtpaıdy. Alǵashqy mamandyǵym muǵalim bolsa da, eńbek jolym jýrnalıst bolýdan bastalǵan. Jýrnalıstıkanyń otymen kirip, kúlimen shyqqan, osy salada talmaı eńbek etkenderdiń biri menmin. Meni halyqqa tanymal qylǵan, eń birinshiden, aqyndyǵym emes, jýrnalıstik qyzmetim. Biraq, qazirgi úlken jýrnalısterdiń biren-sarany ǵana bolmasa, jastar jaǵy meniń jýrnalıstik qyzmetim jaıly múldem estimegen», dep aıtyp otyratyn» deıdi.
Aqyn F.Ońǵarsynovanyń jýrnalıstik jolyna, redaktorlyq qyzmetine, pýblısıstıkalyq shyǵarmalaryna tutas bir shyǵarmashylyq júıe retinde, keshendi túrde tolyq ári shynaıy baǵa berý, onyń pýblısıstıkalyq murasyn búgingi kún turǵysynan alǵash ret ǵylymı aınalymǵa túsirý basylymnyń basty jetistigi bolyp tabylady.
Farıza Ońǵarsynova – aqyndyq óner men jýrnalıstik kásipti qatar alyp júrgen qalamger. Árıne, mundaı úrdis dúnıejúzilik tájirıbede, onyń ishinde qazaq baspasóziniń tarıhynda da bar. Biraq, sırek kezdesetin qubylys. Sondyqtan onyń qyry men syryna qanyǵý, basqalarǵa úlgi-ónege retinde usynýdyń paıdasy mol. Osy turǵydan alǵanda, bul kitaptyń jetistigi men qundylyǵy erekshe.
Jańa týyndyny paraqtap otyryp, avtordyń bul eńbekte Farıza aqynnyń tek jýrnalıstik qyzmetine ǵana ǵylymı taldaý jasamaǵandyǵyn kóremiz.
Bul týyndynyń taǵy bir qundy tusy – Farıza apaımen jaqyn aralasqan adam ǵana biletin, jalpy jurtshylyq úshin belgisiz bolyp kelgen keıbir qyrlary men syrlary ashylady.
Sonymen qatar, syrttaı qaraǵan adamǵa qatal minezdi bolyp kórinetin Farıza apaıdyń adamgershiligi, onyń qandaı balajan kisi bolǵandyǵy, qolynyń jomarttyǵy, márttigi sekildi úlken adamı qasıetteri pash etilip, aqynnyń ómirinen kópshilikke úlgi bolarlyq izgilik isterin baıandaı otyryp, ony jańasha qyrynan tanyta túsedi.
Kitap qalamger qaýymǵa, jýrnalıstıka salasyn zertteýshilerge, stýdentterge, magıstranttarǵa, doktoranttarǵa, BAQ qyzmetkerlerine, jalpy oqyrman qaýymǵa arnalǵan.
Raýshan TÁÝIRHANQYZY,
«Egemen Qazaqstan»