Qarjy salyp, kásip ashqysy keletinder kóp

Sarysýdyń jeri baı. Osynaý keń dalanyń qoınaýy qazynaǵa toly. Sodan bolar sońǵy jyldary osy aımaqtan kásip ashyp, sharýasyn dóńgeletkisi kelgenderdiń qatary kóbeıe túsýde. Sonyń biri – «Asyl tuz kompanııasy» kásiporny as tuzyn óndirý zaýytyn salýdy qolǵa aldy. Bul iske 422,1 mln. teńge ınvestısııalyq qarjy tartylyp, 75 jańa jumys ornyn ashý kózdelip otyr. Kásip­oryn jylyna 50,0 myń tonna as tuzyn daıarlaıtyn bolady. Dál qazir zaýyttyń qurylysy qyzý júrip jatyr. – Jalpy alǵanda, bizdiń aýdanda ınvestorlardyń jańa­dan kásiporyn ashýyna kóp múm­kin­dikter bar, – deıdi Sary­sý aýdanynyń ákimi Beıbit Jaı­lybaev. – Joǵaryda aıtylǵan eki jobamen shektelip qalmaı ın­vestısııalyq jobalardy izdes­­tirip, ony óndiriske engizý jumys­tary qyzý jalǵasýda. Osynyń nátıjesinde aýdan aýmaǵyndaǵy tuz kenderindegi ashy sýlardy paıdalaný negizinde hımııalyq qospasy bar qubyr men úı ashanasynda qoldanatyn tazartqyshtar shyǵarýdy josparlap otyrmyz. Jobanyń quny 230,0 mln. teńgeni quraıdy. Sondaı-aq, «Qazaqsoda» JShS jylyna 400,0 myń tonna kalsıı sodasyn óndiretin zaýyt jobasyna kiristi. Jobanyń jalpy quny 250 mln. AQSh dollaryn qurap, 250-300 adamǵa jumys orny ashylady. Árıne, óndiriske ınvestı­sııalyq qarjy tartý aýdan ekonomıkasyn damyta túsetini anyq. Bıznes degenniń aýqymy keń ǵoı. Bul jobalarmen birge azyq-túlikpen qamtý, jumysshylarǵa arnaıy kıim tigý, kólik jáne basqa qyzmet túrleri qarqyndy damıtyny anyq. О́tken jyly Sarysý aýdanynda negizgi kapıtalǵa salynǵan ınvestısııalardyń jal­py kólemi 16,6 mlrd. teń­­­ge­ni qurap, aldyńǵy jylmen salys­tyrǵanda 8,4 paıyzǵa artypty. О́nim kóleminiń ulǵaıýyna septigin tıgizip, jumys istep tur­ǵan óndiristerdi jetildirý jáne qaıta jańǵyrtý maqsatynda bıyl «Taraz kólik joly» JShS-niń asfalt-beton zaýyty óńirlik ındýstrııalandyrý karta­syna engizilip, 250,0 mln. teń­ge qarjy sa­lynbaq. Búgingi kúni óndiris­tik bazada qurylys-mon­taj jumys­tary aıaqtalǵan, zaýyt jumys jasaýǵa daıyn. 50 adam­dy ju­myspen qamtamasyz etkeli otyr­ǵan bul kásiporynǵa «Bıznes­tiń jol kartasy-2020» baǵdar­lama­sy boıynsha 37,0 mln. teń­gege elektr jelisi tartyldy. Endi zaýyt jylyna 600,0 mln. teńge­niń ónimin óndirýdi josparlap otyr.  Oralhan DÁÝIT, «Egemen Qazaqstan» Jambyl oblysy