Reseıge eksportqa shyǵarylady
Qazaqstan kásipkerleri shilde aıynan bastap Reseıdiń Omby qalasynda azyq-túlik jármeńkesin ótkizip turatyn boldy. Bul másele Qazaqstan kásipkerleri delegasııasynyń osy oblysqa jasaǵan iskerlik sapary barysynda sheshildi.
Respýblıka Aýyl sharýashylyǵy mınıstriniń orynbasary Erlan Nysanbaev sapar barysynda oblys gýbernatory Vıktor Nazarovqa birlesip ótkizetin bólshek saýda jármeńkesiniń kestesin jasaýdy ótindi. Onda Omby oblysynyń úkimetine Qazaqstan ónimderine arnalǵan jármeńkeni shildeniń sońynda ótkizý usynyldy. Kásipkerler bıznes-mıssııa barysynda sondaı-aq Qazaqstanǵa Ombydan restoran jáne kondıter jabdyqtaryn, al Qazaqstannan Omby oblysy men Reseıdiń basqa da aımaqtaryna qymyz jetkizý jónindegi eki kelisimshartqa qol qoıdy. Iskerlik sapary barysynda Qazaqstannyń aýyl sharýashylyǵy, tamaq, qurylys, hımııa jáne qattamaly zattar kesheni salasyndaǵy 20 óndirisshisi ózderiniń óndiristik múmkindikterin kórsetý múmkindigine ıe boldy.
Kezdesý kezinde Nysanbaev eki jaqtyń da ózara saýda-ekonomıkalyq qarym-qatynasty tereńdetip, bıznesti damytýǵa, sonyń ishinde aýyl sharýashylyǵyna basyńqylyq berýge múddeli bolyp otyrǵandaryn atap ótti.
«Qazaqstan iri agrarly el bolyp tabylady. Munda sala tolyq naryqtyq basqarý modeline kóshirilgen, osynyń arqasynda ınvestorlar úshin óte tartymdy da tıimdi bolyp otyr. Eger jaqsy bastamalar bolyp jatsa, biz ony Eýrazııalyq ekonomıkalyq odaq sheńberindegi ıntegrasııa prosesi aıasynda jedeldetýge tıispiz. Sondyqtan, osyndaı ártúrli pishimdegi kezdesýler, únqatysý alańdary qajet», – dedi Qazaqstan delegasııasynyń basshysy.
Sapar barysynda ózara yntymaqtastyqtyń basyńqy baǵyty retinde jármeńkeler almasyp turý ekeni aıtyldy. О́z kezeginde Nazarov jańa birlesken kásiporyndar ashyp, saýda qarym-qatynastaryn damytýǵa múddeli ekendikterin atap ótti.
«Bizdiń oblysymyz eki eldiń iri kólik dálizinde ornalasqan. Sol sebepti de ózara saýda uıymdastyrý úshin shekara aımaǵynda birtutas logıstıkalyq ortalyq ashý jónindegi joba bizge mańyzdy da bolashaǵy zor baǵyt bolyp kórinedi. Omby oblysynyń tranzıttik áleýetin júzege asyrý – bizdiń basyńqy baǵyttarymyzdyń biri», – dedi oblys gýbernatory.
Qazaqstan delegasııasy budan basqa Omby oblysynyń birqatar kásiporyndaryn aralap kórdi. Ol sondaı-aq qazaq tili men mádenıeti ortalyǵynyń jumysymen tanysyp, Qazaqstannyń Ombydaǵy konsýldiginde qazaq qaýymymen kezdesti.
Rýslan IGILIK