Adasqan orden

73 jyldan soń ıesin tapty Jýyrda Shardaraǵa Reseı Federasııasy Bas konsýldyǵynyń keńesshisi Stepan Sokolov arnaıy kelip, aýdan ákimdiginde Uly Otan soǵysynyń ardageri Jurymbaı Aıtóreevke «Qyzyl Juldyz» ordenin saltanatty túrde tapsyrdy. Shardara aýdanyndaǵy kózi tiri qos maıdangerdiń biri Jurym­baı Aıtóreevtiń Uly Otan soǵysy kezinde berilgen «Qyzyl Juldyz» ordenin ala almaı júrgenine bı­yl 73 jyl bolǵan edi. Harkov, Vo­ronej qalalaryn azat etýge qatysqan Jurekeń jaýdy tú­re qýyp, jeńisti Chehoslovakııa je­rinde qarsy alǵan. Basynda barlaýshy, keıinnen áýe desanty bolǵan maıdanger soǵysta naǵyz has batyrǵa aınalǵan. Barlaýshy kezinde ol «Qyzyl Juldyz» or­denimen marapattalypty. Alaı­da, kýálikke «Artýraev» dep qate jazylyp ketýi saldarynan orden ıesine tabys etilmeıdi. Odan keıin áýe desanty bolyp ta jaýǵa oıran salǵan Ju­rymbaı Aıtóreev eren erligi úshin ekinshi márte «Qyzyl Juldyz» ordenimen jáne «Erligi úshin» medalimen marapattalady. Bul orden-medaldaryn búginge deıin jarqyratyp taǵyp júr. Alaıda, uzaq jyldan beri Máskeý jaqqa hat jazyp, birinshi «Qyzyl Jul­dyz» ordenine izdeý salýmen bolady. Aýdandyq qorǵanys isteri bólimi arqyly byltyrdan beri qujattary Reseıge taǵy da joldandy. Aqyry, kópten beri sa­ryla kút­ken qýanyshty sát te kelip jetti. Qos «Qyzyl Juldyzdy» óńi­rine jarqyrata taqqan qart maıdanger erekshe kúıge túsip, Reseı dıplomaty men aýdan basshylaryna alǵysyn jaýdyrdy. Soǵys kezindegi oqıǵalar eske túsken Jur­ekeń urystardyń keıbir sát­terin áńgimelep te berdi. – Bul orden maǵan 1943 jyly berilgen edi. Bizdiń barlaýshylar toby asa bir jaýapty tapsyrmany oryndap kelgenbiz. Jaýdyń 30-ǵa tarta sarbazyn óltirip, 7 mashınasyn talqandadyq. Sol tapsyrmany abyroımen oryndaǵan on adamǵa marapat berildi. «Qyzyl Juldyz» ordenimen marapattalǵanym týraly 14 qazanda shyqqan «Boevoe znamıa» gazetine jarııalandy. Dnepr­­den ótken bir urysta aýyr jaralanyp, gospıtalǵa túsip qal­dym. Sol kezde orden kelgen eken, biraq kýálikke famılııam qa­­te jazylýyna baılanysty keri qaıtyp ketipti. Sol ordenimdi izdep júrgenime 73 jyl bolypty bıyl, endi qolym jetip otyr, – deıdi Jurymbaı ata. Jurymbaı aqsaqal áli de qart­tyqqa des bermeı, óz aıaǵymen júrip-turady. Baýyrynan órbigen 5 uldan 22 nemere men 40 shóbere súıip otyrǵan soǵys ardageri tamyryn tereńge jaıǵan báıterek ispetti. Jurymbaı atamyz ár­ýa­qytta da: «Biz kórgen soǵysty sen­der kórmeńder, el-jurt aman bolsyn», deýmen otyrady. Ádil ÁBDIRAMANOV, Shardara aýdany ákimdiginiń qyzmetkeri  Ońtústik Qazaqstan oblysy