Atyraýda dızel otynyn zańsyz tasymaldaýshy ustaldy

ATYRAÝ. 20 mamyr. Atyraý oblysynda munaı ónimderin zańsyz tasymaldaý deregi anyqtaldy. Bul týraly memlekettik kirister departamentiniń baspasóz qyzmetine silteme jasaǵan egemen.kz tilshisi habarlady. «Atyraý oblysy boıynsha memlekettik kirister departamentiniń ekonomıkalyq tergeý qyzmeti men jergilikti polısııanyń birlesken jedel-izdestirý sharalary barysynda Atyraý-Dossor trassasynda «Qarabatan» ýaqytsha beketinde Daf Te 105Xf markaly tirkemeli avtomashına toqtatyldy. Atalǵan avtomashına tekserilip, tirkemesinde 26 dana arnaıy plastıkalyq ydystarǵa quıylǵan shamamen 26 000 lıtr suıyqtyq anyqtalǵan. Júktiń ilespe qujattary boıynsha atalǵan ydystarda «Etılenglekol» hımııalyq zaty dep jazylǵan. Júk jóneltýshi retinde Granit jaýapkershiligi shekteýli seriktestigi kórsetilgen. Biraq, kórsetilgen ydystardy ashqanda munaı óniminiń (dızel janarmaıy) ıisi bar maıly suıyqtyq anyqtaldy. Osyǵan oraı mán-jaıdy anyqtaǵansha tirkemeli avtokólik quraly arnaıy turaqqa qoıyldy. Al atalǵan jaıt boıynsha memlekettik kirister departamentiniń ekonomıkalyq tergeý qymeti Qylmystyq kodekstiń 197-babynyń 1-tarmaǵymen (Munaıdyń jáne munaı ónimderiniń shyǵarylý zańdylyǵyn rastaıtyn qujattarsyz olardy tasymaldaý, ıemdený, ótkizý, saqtaý, sondaı-aq, munaıdy qaıta óńdeý) sotqa deıingi tergeý tirkeldi. Qazirgi ýaqytta Qazaqstan aýmaǵynda Granit seriktestigi tirkelmegeni belgili boldy. Demek, jaıt boıynsha jalǵan qujattar jasaý qylmysynyń belgileri bar. Sonymen qatar, sotqa deıingi tergeý barysynda kórsetilgen júkten úlgiler alynyp, saraptama júrgizý úshin «AtMО́Z» mamandary tartyldy. Aldyn ala berilgen qorytyndyǵa qaraǵanda, tirkemeli kóliktegi plastıkalyq ydystardaǵy suıyqtyq «dızel janarmaıy» bolyp tabylady. Qylmystyq isti tergeý jalǵastyrylýda. Joldasbek Shópeǵul. Derek: Atyraý oblysy boıynsha memlekettik kirister departamentiniń baspasóz qyzmeti. Foto: today.kz.