ASTANA. 21 mamyr. Búgin Astanadaǵy Ulttyq mýzeıde Jer reformasy jónindegi komıssııanyń kezekti otyrys ótti. Bul týraly egemen.kz tilshisi habarlady.
Alqaly jıynda Premer-Mınıstrdiń birinshi orynbasary, komıssııa tóraǵasy Baqytjan Saǵyntaev saǵat 10:00-de bastady. Ol búgingi jıynǵa 67 adamnyń qatysyp otyrǵanyn, basqosýdyń negizgi baǵyty jerdi satý máselesin jan-jaqty taldap, usynys-pikirler aıtylatynyn jetkizdi.
«Komıssııanyń negizgi maqsaty – jer máselesi jóninde egjeı-tegjeıli taldaý jasap Parlament qaraýyna óz usynysymyzdy jiberý. Biz ýákiletti organ emespiz. Naqty sheshim shyǵaryp, mór basatyn. Sondyqtan biz halyqqa paıdaly jaǵyn qarastyraıyq», – dedi komıssııa tóraǵasy. Baqytjan Saǵyntaev sondaı-aq, komıssııa múshelerin tórt topqa bólip, jan-jaqty jumys jasaý kerektigin aıtty. Ol úshin top jetekshilerin saılaý kerek.
Sonymen, «Ekonomıkalyq» topqa Aqylbek Kúrishbaev, «quqyqtyq» topqa Muhtar Taıjan, «aqparattyq» topqa Murat Ábenov jáne «uıymdastyrý» jónindegi topqa Dos Kóshim jetekshi bolyp taǵaıyndaldy.
Munan keıin komıssııa quramy ret-retimen sóz alyp, jer satý máselesine qatysty óz oılaryn aıtyp, usynystaryn bildirdi.
«Jerdi jalǵa berý kezinde sheteldikterge shekteý qoıý kerek. Eń birinshi kezekte el azamattaryna berý kerek dep esepteımin», – dedi komıssııa múshesi Jeksenbaı Dúısebaev. Al Berik Ábiǵalıdiń pikirinshe, jer jeke menshikke berilýi kerek.
«Jerdi jekege berýge kelisemin. Alaıda, jaılymdyq jáne shabyndyq jerler jekege ótip ketpeýi tıis. О́ıtkeni, mal sharýashylyǵymen aınalysatyndarǵa óte qıyn» – dedi ol.
Jalpy, komıssııa otyrysynda kóptegen pikirler aıtyldy. Biri jerdi jalǵa berý kerek, otandyq kásipkerlerdiń oń jambasyna keletindeı jaǵdaı jasaý qajet dese, keıbiri ózimizdiń azamattarǵa tegin úlestirý kerek degen pikirler bildirdi. Jıynda sóz alǵandardyń arasynda jerdi sheteldik ınvestorlar arqyly ıgerý kerek dep sanaıtyndar da boldy.
Otyrys qorytyndysynda tóraǵa aıtylǵan usynystar men pikirler jan-jaqty taldap-tarazylatynyn málimdedi. Sonymen qatar, Baqytjan Saǵyntaev kelesi otyrys 28 mamyr kúni ótetinin habarlady.
«Biz kelesi jıynda osy aıtylǵandardy ábden súzgiden ótkizip, óz usynystarymyzdy naqtylap alamyz. Sosyn baryp elge shyǵamyz. Onda aǵaıyn-jurt kútip otyr. Bizdiń ne aıtatynymyzydy kútip júr. Sol úshin daıyndalyp alýymyz kerek» – dedi tóraǵa.
Talǵat Raıymbek.
Derek: egemen.kz.
Foto: Orynbaı Balmuratov.
