Jetisýda mádenıet salasynyń úzdikteri marapattaldy (foto)

TALDYQORǴAN. 21 mamyr. Keshe Almaty oblysynda mádenıet salasynyń úzdik mekemeleri men jekelegen qyzmetkerleri anyqtalyp, oblys ákiminiń syılyqtary men marapattaryna ıe boldy. Bul týraly oblystyq ákimdik baspasóz qyzmetiniń deregine súıengen egemen.kz tilshisi habarlady. Ol mádenıet jáne óner qyzmetkerleriniń kásibı merekesine oraı I.Jansúgirov atyndaǵy mádenıet saraıynda ótken jıynda jarııa etildi. Saltanatty jıyndy sóz sóılep ashqan oblys ákimi Amandyq Batalov óńirdegi mádenıet jáne óner ujymdarynyń jetken jetistikterine, el táýelsizdiginiń 25 jylynda atqarylǵan ıgi isterdi nasıhattaýdaǵy óner adamdarynyń sińirgen eńbegine joǵary baǵa berdi. Aımaq basshysy sonymen qatar, oblys mádenıet qyzmetkerleri aldarynda turǵan mindetterge toqtalyp, salany damytýǵa erekshe nazar aýdarylyp otyrǵanyn atap ótti. Mádenıet nysandaryna kúrdeli jóndeý júrgizilip, jańa nysandardyń qurylystary bastalýda, shtat bólinip, materıaldyq-tehnıkalyq bazalary nyǵaıtylyp keledi. A. Batalov sóziniń sońynda sala qyzmetkerlerin tól merekelerimen quttyqtap, olarǵa aldaǵy ýaqyttarda da el ıgiligi jolynda jemisti qyzmet ete berýge tilektestik bildirdi. Sodan keıin óz isiniń úzdikterine Mádenıet jáne sport mınıstrliginiń, oblys ákimdiginiń Qurmet gramotalaryn tabys etti. Osy oraıda 16 atalym boıynsha úzdik tanylǵan ozattarǵa aqshalaı-zattaı syılyqtar tapsyrdy. M. Tynyshbaev atyndaǵy tarıhı-ólketaný murajaıynyń «Úzdik mádenıet mekemesi» bolyp tanyldy. Osy úshin mekemege avtokólik berildi. Budan ári túrli nomınasııalar boıynsha úzdik atanǵandar marapattaldy. Atap aıtqanda, B. Rımova atyndaǵy oblystyq drama teatrynyń ártisi Bazarbaı Toqymtaev «Úzdik akter», osy ujymnyń aktrısasy Tolǵanaı Aǵlamova «Úzdik aktrısa», Súıinbaı atyndaǵy oblystyq fılarmonııanyń ánshisi Baqbergen Asqarbekov «Úzdik ánshi», osy óner ujymynyń músheleri Altynaı Kúrishbaeva «Úzdik bıshi», Alma Kishikbaeva «Úzdik mýzykalyq aspapta oryndaýshy» nomınasııalaryna ıe boldy. Úzdikter qatarynan sondaı-aq Ile aýdandyq jáne Jambyl aýdany, Qarakestek aýyldyq kitaphanalary, Panfılov aýdanyndaǵy «Aıjanqyz» halyqtyq bı ansambli kórindi. Jeńimpazdarǵa dıplom men 100 myń teńgeniń sertıfıkaty tabys etildi. Budan bólek, «Súıinbaı sazy» folklorlyq-etnografııalyq ansambline jańa avtobýstyń kilti berildi. Merekelik keshte mádenıet salasynyń ardagerleri atynan Nadejda Lýshnıkova, sala qyzmetkerleri atynan Alakól aýdandyq mádenıet jáne tilderdi damytý bóliminiń basshysy Arnur Sadyqov sóz sóıledi. Mereke qorytyndysy óner sheberleriniń konsertine ulasty. Nurbol Áldibaev. Derek, foto: Almaty oblystyq ákimdiginiń baspasóz qyzmeti.